Symon de Vos.
Schilder van Antwerpen.
MEn behoeft gheen sonderlinghe proeve oft ghetuyghenis te leyden, om waer te maecken ende te bethoonen dat de oeffeninghe van het Pinceel soet ende lieffelijck is, om alsoo den jever der jonckheyt daer op te doen verlieven, ghemerckt de selve niet van een aengheport verstandt maer van Coninghen en Princen wort gheoeffent ende met een vermaeckelijck behaeghen aenghesien. Dese Const is soo eel dat sy niet alleen van vermaerde Poëten, gheleerde Philosophen en andere vrome verstanden en is ghehandelt ende haer cracht met de penne van gheleertheyt beschreven, maer vande hoochste Monarchen des werelts is verbreyt gheworden. Den Keyser Adrianus is in sijnen tijt een Ga naar margenoot+ uytnemende Schilder gheweest, Marcus Anthonius Philosooph, den Keyser Nero, Valentinianus, ende Alexander Zeverus oock Keysers van Roomen hebben in dese loffelijcke Const oock groot behaghen ghehadt ende selver ghehanteert. Boven dien den Keyser Constantinus den VIII. van dien Naem, zijnde uyt het Keyser-rijck van Griecken verdreven in't jaer Neghenhondert achthien, heeft sijn selven met de oeffeninghe van d'edele vry Schilder-const onderhouden, en meer andere uytnemende ende ghedenckweerdighe sulckdanige voorvallen sou connen by brenghen waer door ghetoont can worden met wat eer de selve Const niet alleen by ghemeyn Persoonen, maer oock by sulcken Potentaten vermach. Sulckx can oock waer maecken Symon de Vos die noch teghenwoordich binnen Antwerpen is woonende, gheboren in't jaer 1603. ende de Const met goedt fondament ende cloecken aert is hanterende, soo in't groot als in't cleyn daer zijn wercken goede ghetuyghenis af connen gheven, midts de selve seer wel ghecoloriert, vast ghestelt en wel ghehandelt zijn: als te sien is aen verscheyde stucken die hy met groot verstandt en goeden gheest soo tot Antwerpen als andere plaetsen heeft ghemaeckt te lanck om de selve hier aen te wijsen.
Auteursrechtvrij