Den groeyenden Lierschen blom-hof

[p. 134]

Clinck-Dicht, tot alle Rijm-Beminders.

Constich en vvijt beroemt ghy hoogh befaemde Dichters
Om inde Rijme-Const te vvorden niet veracht,
Roep u tot onderstant, op dat vande betichters
Nijdich t'Poëts gheschrift noot en vvort uyt-ghelacht,
En dat Zoilus noot en Momi tongh vercoopers
Lesen hier uyt veel quaet, ghelijck de svverte spin
In haer suyght schadelijck gift, oft dat de vuyl straet-loopers
Vermaken my oock noot met schimp aen yders sin
Seker k'en acht nochtans spot, oft lof niet met d'allen
Daerom en oordeelt niet verstaet eerst met plaisier
En cleedtse niet met schimp, ick can dickvvils vvel vallen
Ben in het dichten maer een Genij scholier.
Ick en can tvvijff'len niet dat ghy vernufte Heeren
Eens oversiende t'selff, dat sult misprijsen, en
Lichtelijck versmaen, maer vvel met eer vermeeren
Ist dat sy sijn ghelijck aen d' eel Poësi pen
Ist dat sy naer u sin ghenoechsaem niet en vloeyen
Roept clappers tonghe niet die t'met on-eer bedeckt
Aensiet, verbetert oock vvilt van haer, dees behoeyen
Niet met ghestolen Rijm en sijn sy hier bevleckt.

VVaerheyt baert nijt.