Wat preparaten dat de Arch-Hertoghe ghemaeckt heeft.
[1600.] EErick voort-vare in dit verhael/soo moet ick eerst beschrijven wat de Arch-Hertoghe ghedaen heeft/ hoorende dat sijn Excellentie hem dus onversiens in Vlaenderen gevallen was/ d'welck sijn beste melck-Koe is. Jck segghe onversiens ende onverwacht/ want hare Hoocheden hoorende dat de Staten ende sijn Excellentie gereetschap maeckten om te velde te trecken/ vermoedden gantschelijck/ dat het op Rijn-Berck ofte op de Steden aen den Maes-cant in het over-quartier van Gelderlant gelden soude. Doch siende dat het op Vlaenderen ghemuntt was/soo heeft Albertus stracx eenighe van sijne Colonellen ende Overste gesonden aen sijne ghemutineerde Soldaten/om haer te beweghen ende bewillighen/dat sy immers hem desen noodtwendigen tocht en dienst niet af-slaen en souden/dewijle hy den vyandt nu in het bloote velt hadde/ op ghelijck voordeel ende plaetse/ daer sy langhe ghewenscht hadden hem eens te moghen crijghen: De Arch-Hertoghe beloofde/ dat hy haer selfs soude aen-voeren/ ende dat hy sijn leven by haer woude waghen / &c. Jmmers hebben het des Hertoghen af-ghesondene soo wijdt ghebracht/ dat sy voor eerst de ghemutineerde van Diest/ ende noch eenighe andere hebben willich ghemaeckt/ de Waelen belovende neghen maenden [1600.] solts te betalen: De Jtalianen/ Spaenjaerden/ ende Duytsche beloofden sy vol te betalen/maer op terminen/in neghen maenden tijdts. Die van Diest en wouden niet marcheren onder hare ghewoonelijcke Capiteynen ende Officieren/maer onder haren Eletto, ende onder een groote nieuwe baniere/ die sy tot dien eynde hadden maken laten: Sy lieten besettinghe in Diest ende elders/ als oock haren tros ende baggagie.
Alle de ghemutineerde / die willich ghemaeckt wierden desen tocht te doen / waren sterck boven de twee duysent Man / soo te voet/ als te peerde/ ende sy zijn te Langher-brugghe by Gent ghecomen/ daer voor eerst het rende-vous ofte loop-plaetse van des Hertoghen volck verordineert was. Hier zijn op den xxviii. Iunij by een gecomen ontrent veerthien hondert Peerden / ende elf duysent te voet/ alle gaer oudt Crijchs-volck. Den xxix. is de Infante met den Hertoge door het Legher ghereden/ende sy heeft het Crijchs-volck moet aengesproken/ende vermaent vromelijck te vechten tegen de godloose Ketters/ende teghen hare Rebelle / d'welck Godt en sy verghelden souden/ &c.
Auteursrechtvrij
