[1585.] ende Schuyten/wel versien met volc ende allen nootdruft. Hy heeft stracx de dijcken op verscheyden plaetsen door-ghesteken/ ende het water in't Landt laten loopen/soo dat de Spaensche nerghens en conden logieren/dan alleenelijck op de dijcken/ op het hooghe landt/doch meest onder den blaeuwen Hemel/ in den windt en vorst/of in de Kercken/sijnde midden in Decembri, ende het was eenen couden winter. So dat de Spaensche/ aldus van het water ende de Hollantsche Schepen omcinghelt ende besett zijnde / in grooten honghers-noodt / coude / ende allerley ongemack gheraeckt zijn/ gheen uytcomste noch verlossinge wetende. Want of sy schoon wel ses mael soo sterck waren als Hohenloh met sijn volck / soo en costen sy noch slaen/ noch ontloopen/ende niemant en conde by haer comen om haer te ontsetten. Jn somma sy waren in den uytersten noodt ende benautheyt / apparent alle gaer van hongher ende van coude te sterven/ of haer te moeten gheven in handen van Hohenlo. Maer ten heeft den Heere niet belieft / dit volck aldus te laten om den hals comen / hy woude die roede noch langer tot straffe der Landen ghebruycken: Want nae dat de Spaensche vier daghen lanck in desen noodt ende benautheyt gheweest waren/ soo heeft het met eenen Noodt-westen windt soo hart gevrosen/ dat de Grave van Hohenloh met sijn Schepen daer niet langher en conde noch en dorst blijven ligghen/ vreesende als het ys soo sterck soude zijn dat het over draghen soude/ende dat dit hongherighe desperate volck/ het eene Schip voor/ het andere nae/ vast in het ys liggende [1585.] /soude aenvallen/ innemen/ alles ombrengen/ende met den buyt daer van trecken. Soo haest en waren de Hollandtsche Schepen niet vertrocken/ of ten begon te doyen: Stracx zijn die van den Bos met veel Schuyten / geladen met allerley victualie op den xii. Decembris dese halfdoode benaude Spaenjaerden ter hulpe ghecomen/
ende hebbense uyt het water verlost ende afgebracht/d'welck sy bequamelijck hebben connen doen/ overmits der Staten volck/ door quaet beleyt/een plaetse ghenoemt de Locht verlaten hadden. Veel van de Spaensche zijn corts hier nae gestorven/ eenigen zijn dese of gheene deelen des lichaems afghevallen / anderen heeftmense moeten afsnijden/ overmits het coude vuyr daer in ghecomen was. Dese tijdinghe van de benautheyt daer de Spaenjaerden in waren creech de Prince van Parma even als hy sijn nieuwe blijde incomste met groote triumphe binnen Brussel dede. Stracx is hy met veerthien of vijfthien Peerden te poste nae den Bos toe gereden om Mansvelt te gaen ontsetten: Maer te Herentals gecomen zijnde/heeft hy verstaē/dat sy ontcomen waren/daerom hy seer verblijdt was. Hy heeft den Magistraet ende Borgherije van den Bos hooghelijck bedanckt voor den goeden dienst dien sy den Coninck ghedaen hadden / ende tot een teken van danckbaerheyt/heeft hy de Stadt gheschoncken eenen schoonen verguldenen Cop/ ende de armen aldaer heeft hy ghegheven tachtentich Ossen.
Accedit in puncto quod non speatur in hora.
Auteursrechtvrij
