Afbeeldinge ende beschryvinghe van alle de veldslagen, belegeringen ende and're notabele geschiedenissen ghevallen in de Nederlanden

Geduerende d'oorloghe teghens den coningh van Spaengien: onder het beleydt van den Prince van Oraengien, ende Prince Maurits de Nassau

Schermutselinghe tusschen Duc d'Alensons ende des Princen van Parmas volck/ by S. VVijnocx-berghe, den derden Augusti, Anno 1582.

[1582.] WEynich dagen eer Oudenaerde overghegeven werdt/is de Grave van Rochepot, Colonel van het Fransche Voet-volck/met het Crijchs-volc dat onder Gent hadde beschanst ghelegen/getrocken nae Duynkercke/om aldaer te ontmoeten ende dieper int Landt te convoyeren Graef Carel van Mansvelt, (Neve van Graef Carel van Mansvelt die den Coninck van Hispanien diende) comende door Vranckerijck lancx den Zee-cant/met vijfthien hondert Duytsche Ruyteren/ende eenich Frans Voet-volck/onder het beleyt van den Heere de la Pierre, met de welcke men Oudenaerde meynde te ontsetten/ d'welck sy apparentlijck wel souden gedaen hebben/hadden sy vroech [1582.] ghenoech ghecomen/

Fronte capillata, post est occasio calva.
Een weynichsken te laet is veel te laet.

Dese Ruyteren ende Knechten t'samen in Vlaenderen tusschen Duynkercke ende S. VVijnocx-berghe (welcke Steden maer een mijle weechs van malcanderen en ligghen) gheleghert zijnde/is de Prince van Parma met een groot deel des Legers d'welck Oudenaerde ghedwonghen hadde/daer nae toe getrocken/ ende heeft hem den tweeden Augusti nae by der Francoysen Legher gheset: Stracx hebben dese beyde Leghers malcanderen met schut-gheveert gegroet/ende

[p. 417]

(144)
Schermutsing bij Wijnox Bergen vande Malcontens En dē leger vanden Hertoch van Brabant. Escarmouche fait par le Malcontens et le camp du Duc de Brabant. 1582. le 3. Aůst.

[p. 418]

[1582.] gheschermutseert tot dat den avondt haer scheydde/ soo dicht onder S. VVijnocx-berghen, datmen met grof Gheschut daer uyt geschoten heeft op de Spaensche. Des anderen daechs quam de Prince van Parma met sijn Legher de Francoysen noch naerder/alsoo datter maer een cleyn Rivierken tusschen dese beyde Legers en was. De Grave van Rochepot lach op dat mael cranck binnen S. VVijnocx-berghen, even wel heeft hy sijn devoir seer wel ghedaen/hy liet sich dragen op de Stadts-muyren/van waer hy alle ghelegentheytsien conde/ende hy heeft op alles ordre gegeven: Hy heeft bevolen/datmen uyt alle Vaendelen soude nemen eenighe goede Arkebusiers/tot twee duysent toe/ende daer by vijfhondert Peerden/ende dat de reste binnen de Legher-plaetse in slach-ordre souden staende blijven/tot naederen last. De Prince van Parma, behalven dat hy verre de sterckste van volcke was/so heeft hy de Francoysen dit voordeel afghesien/ dat hy terstondt alle de Weghen/Hagen/en Grachten inghenomen heeft/ d'welck hem seer voorderlijck ende den Francoysen seer schadelijck was. Doch de voor-verhaelde twee duysent Francoysen zijn den derden Augusti haren vyandt soo mannelijck aenghevallen/dat sy hem uyt sijn voordeel ghedreven hebben/ ende dat met sijn groote schade. De Prince van Parma willende sijn schade weder in-halen/ sont den Baron van Balancon [1582.] (die daer nae Grave van Varax gheworden is/ Broeder van den Marquis van Varrabon of Warenbon) met sijn Compagnie lichte Peerden/ende een ander Compagnie Archebusiers te Peerde / die op de Fransoysen eenen onversaechden aenval deden/maer sy wierden soo ontfangen op de Enghelsche Spiessen/ daer sy door dansen moesten/ dat haerder vele doodt bleven. De Baron werdt van Norrits Enghelsche Ruyters ghevanghen/ende nae Antwerpen gevoert/ sijn Vane of Cornette wert ghenomen/ende de Vaendrager werdt doodt gheslagen. De helft van de beyde Parmesaensche Vaenen bleefer wel doodt / ende daer toe noch tusschen de vier of vijfhondert Voet-knechten. De Francoysen ende Engelsche leden cleyne schade/maer creghen goeden buyt. Dit gheschiedt zijnde/zijn de beyde Leghers opghetrocken. Het innemen van Aelst / ende dit cleyn victoritgen heeft die van Vlaenderen/die des maels in grooten noodt ende benautheyt waren/ een weynichsken verquickt/gelijck een weynichsken wijns eenen crancken Mensche het herte verheucht/ ende het heeft den vromen bedruckten ghemoederen oorsake ghegheven met den Coninck Assa te bidden ende te spreken/ 2. Par. 14. vers. 11.

Heere by u en isser gheen onderscheyt, te helpen door vele, of daer gheen cracht en is: Helpt ons Heere onse Godt, vvant vvy verlaten ons op u.