Executie over Antonis Timmerman Mis-pape / ende over Antoni Venero ghedaen binnen Antwerpen.
[1582.] ANtonius Timmerman Jacobiner Monick/is/ ghelijck te vooren verhaelt is / gevonden ende ghevanckelijck genomen in het huys van den Moordt-stichter Anastro, alwaer hy gewoon was in het heymelijcke Misse te doen. Om dat hy kennisse ende wetenschap van dese moordt gehadt hebbende / die niet en heeft gheopenbaert / maer heeft den Moordenaer de biechte gehoort/ het Sacrament ghegheven / hem versekert dat hy een kindt des eeuwighen levens soude worden / als oock hem wijs gemaeckt / dat hy invisibel ofte onsichtbaer soude zijn/ tot welcken eynde hy hem eenige characteren op pampier ghegheven hadde/met eenighe steentgens/beentgens/welcke sy Reliquien noemen / den selfden gheleydende tot aen het Casteel des Princen logement/ onder weghe hem in sijn boos voornemen sterckende ende stijvende / ende hem tot aen de trappen van des Princen camer ghebracht hebbende / aldaer de benedictie ghegheven hadde: Soo is hy verwesen als eenen verrader / gheselle / ende mithulper eenes grouwelijcken Moordenaers / met den stroppe geworght te worden / daer nae ghevierendeelt / ende het hooft met de quartieren op de Stadts-poorten ghesett te worden / d'welck oock geschiet is / den xxviii. Martij, onaenghesien dat de vrome Prince van Oranien voor [1582.] hem ende sijne complicen ernstlijck gheintercedeert ende ghenade by de Overicheyt versocht hadde. Qui male pavit oves, nunc bene pascit aves.
Ten selven daghe en stonde is oock met ghelijcke sententie ende vonnisse ter doodt verwesen/ Antonio de Venero, Spaenjaert, Kassier ofte Boeck-houder van Anastro, den welcken Anastro, sijn godloos voornemen eerst gheopenbaert ende ontdeckt hadde/versoeckende dat hy hem dese moordt te doen hem beloven woude; als daer mede connende Godt eenen aengenamen dienst doen/als oock den gantschen Lande ende Kercke/ ende mede hem in't particulier: Desen Venero heeft sijnen meester Anastro dit te doen afgheslaghen/ segghende / dat hy te bloode ende te cleynhertich was om dat te beginnen: Doch nae dat hy hem een weynichsken bedachtt hadde / soo seyde hy: Daer en is gheen Man ter weerelt bequamer om dit te doen, als onsen Ioanille (verstaende Iean Iauregui) die sal het wel aennemen / ende hy sal het oock wel uytvoeren / want hy is stout ende onversaecht. Jn dusdanighe moordt-stucken heeft den heeler soo groote schult/ als die het werck verrichtt ende doet.
Auteursrechtvrij
