Afbeeldinge ende beschryvinghe van alle de veldslagen, belegeringen ende and're notabele geschiedenissen ghevallen in de Nederlanden

Geduerende d'oorloghe teghens den coningh van Spaengien: onder het beleydt van den Prince van Oraengien, ende Prince Maurits de Nassau

[p. 383]

De incomste van Duc d'Alenson binnen Antwerpen/ den XXII. Februarij, Anno 1582.

[1582.] DJt alles/soo te vooren verhaelt/gheschiedt zijnde / is den nieuwen Hertoghe van Brabant op een schoon wit Napels Peerdt / costelijck behanghen / gaen sitten / ende hy is nae de Stadt ghereden / de Keysers Poorte in. Nae hem volchden de Hooch-duytsche ende Oostersche Coop-lieden/ meest te Peerde/ al in't wit ghecleedt/ doch eerst voor aen rijdende de Sergeanten Majors/ met de Stadts-boden ende Trompetten. Daer nae de Enghelsche / al op eenderley maniere gecleedt/met Casacken vans wart Fluweel. Nae dese volchden de Colonellen ende Capiteynen der Stadt / met veel Edel-lieden/ soo in-landtsche/ als Francoysen ende Enghelsche: Nae dese volchde het lichaem van der Stadt/te weten de Magistraten/ ende alle de voornaemste Officieren der Stadt/als d'Amptman/Pentionarisen/ Secretarisen/ Tresoriers/ Ontfanghers/ ende andere Officieren/ al met swarte Fluweelen Mantels omhanghen. Nae dese volchden de Trompetten der Staten / met de Heeren Staten / eerst de Ghedeputeerde der Steden / daer nae de Edele van Brabant. Nae haer volchde de Cancelier van Brabant/met Lamorael van Egmont/Baron van Gaesbeke/des Grave van Egmonts Broeder. Nae dese volchden de Switsers ende des Hertoghes Hellebardiers: Daer nae/de Francoysche /Engelsche/ende Neder-landtsche Heeren/ ende nae dese de Marck-Grave van Antwerpen/ bloots hoofts / draghende een Roede van Justitie in de handt. De Baender-Heere van Merode / Heere van Petersum/dien dach bedienende den Staet van Marschalc van Brabant/ droech een bloot sweert voor den Hertoghe / desen volchde de Hertoghe in sijn pontificael. Hy werdt gevolcht van sijn Fransche Guarde, ende was omringhelt met de Gulde-broeders van den Handt-boghe/ [1582.] Voet-boge/ende Cloveniers/alle gaer met de schoonste wapenen om-hanghen diemen hadde connen vinden. Aen de Poorte verwachtten hem ses Edel-lieden van der Stadt/ met eenen hemel van ghefriseert gouden laken / dien sy over sijn hooft alleen droeghen tot dat hy van het Peerdt af-tradt. Binnen de Poorte ontmoete hem den triumphanten Waghen/ ghenoemt den VVaghen des Verbondts, daer op satt een schoone jonghe Dochter / seer costelijck verciert / representerende de Maecht van Antwerpen. Jn der Stadt waren ghestelt op alle de hoecken der straten daer hy passeren moest/ Pyramiden, Colossen, Arcus triumphales, ofte stellagien met figueren/ oock stellagien met verscheydene vertooninghen/ elck hare bebuydinghe hebbende/ghepast op de teghenwoordighe ghelegentheyt /seer heerlijck / cierlijck/ oock seer costelijck ende constelijck. Oock werdt mede vertoont den grooten Reuse, die van over ondenckelijcke jaren in de Processien ofte Ommeganghen vertoont wort/ zijnde een seer groot stock-beeldt / als eenen Reuse/ den welcken volghen eenighe Mannen / der welcker eene handt schijnt afghesneden te zijn: D'welck hier van sijnen oorspronck ghenomen heeft/dat/soo eenige schrijven/ ten tijde van Iulius Caesar, op de kant van de Schelde een Borcht ofte Casteel ghestaen heeft/ daer in eenen grooten Reuse woonde/genoemt Druon (andereschrijven Antigon) die tyrannichlijck levende op dese passagie/ dede betalen de halve weerde van alle de Coop-manschap die daer passeerde: Ende als hy eenich bedrogh by den Coop-man vondt / soo confisqueerde hy al het goet/ende dede daer en boven/ nae den inhoudt sijner Wet / des Coop-mans handt af-houwen/ ende in den vloed werpen: Alsoo dat van

[p. 384]

[1582.] handt ende werpeu de ghebuyren de Burght Handtwerpen ghenoemt hebben. Tot bevestinghe van dit boven-verhaelde dient aengemerckt/dat deser Stadt wapen noch op desen dach/is een Burght/ende daer by staende twee afghehouwene handen.

Schoone Musijck isser eenighe daghen lanck al de Stadt door geweest. Op de wijde plaetsen der Stadt stonden alomme de Borgheren in fraeye slach-ordre/ onder hare Vaendelen: In somma hy is Conincklijck ontfanghen ende ghewillecomt: Al de solemniteyten/ ceremonien/ende triumphen duyrden soo langhe/dat sijn Hoocheyt eerst des avondts spade / alst doncker was/in sijn Palleys ghecomen is: De geheele Stadt door stonden veel Tortsen en Fackelen/oock warender vuyren in alle de straten der Stadt/ ende op de Kerck-toorns; Soo dat de Stadt scheen in een vuyr te staen. De Herauten van Brabant/ Limborgh/ ende Lotrijck/&c. riepen elcke reyse Vive le Duc de Brabant, ende sy saeyden hier en daer goudene ende silveren penningen/met des nieuwen Hertoghs beeltenisse [1582.] aen d'een sijde / met een omschrift in den rinck daer drie F.F.F. in quamen/beduydende Franciscus Filius Franciae, doch andere maecktender van Frustra funera facis. Op d'ander sijde stondt sijn devise / namelijck Een opgaende Sonne, die alle duysterheyt ende onweder verdrijft / met Fovet & discutit, dat is / Sy coestert ende verdrijft, willende daer mede te kennen gheven / dat hy hoopte als een opgaende Sonne/ alle donckerheyt ende onweder te verdrijven/ ende alle vruchten ofgoede saken te coesteren ende te verquicken. Den Hertoghe doe hy sijn incomste binnen Antwerpen dede / volchden by de drie hondert misdaders ende ghebannene / bloots hoofts/ al aen een coorde haer vast houdende/begeerende ghenade ende landtwinninghe /die sy vercregen. Als hy in het Palleys ghecomen was/so werdender wel xx. of xxx. duysent Roers en Musquetten tseffens los geschoten/ende tot tweemael toe al het grof Geschut rontom de Stadt.

Vanitas vanitatum, & omnia vanitas,
Sic transit gloria mundi.

[p. 385]

(132)

Urbs antiqua jacet pulchrae regionis ocellus,

Divitijsq_Ʒ armisq_Ʒ potens ANVERSA, recepit

Illa DUCEM, insigni pompâ properabat in Vrbem,

Vidit et Indomitum caput ad fera bella GIGANTIS.