[1581.] Parma Vaendelen voet-knechten. Duc d'Alenson meyndedat de verbaestheyt by dit volc so groot soude wesen/dat sy hem met sijnen geweldigen Legher niet en souden durven die plaetse lange onthouden: Maer hy heeft veel anders bevonden/ want sy hebben haer dapperlijc geweert/hopende dat de Prince van Parma/die met sijn Legher niet verre van daer en was/ haer soude comen ontsetten. Duc d'Alenson heeft sijn Gheschutt voor dit Casteel ghebracht/ende heeft daer mede geschoten op het Casteel twee hondert ende negen scheten/ een groote bresse makende/ door de welcke hy het Casteel meynde vechtender handt in te nemen. D'welc die van binnen siende/ende vreesende dat de Francoysen haer met een furie souden overweldigen/so hebben sy haer in des Hertogen handt overgegheven/ghenochsaem tot sijn eygen discretie: Hy liet het garnisoen uyt trecken met haer wapenen/ doch met doode lonten/ ende sonder trommel-slach/des sy wel blijde waren/want sy seere vreesden/ dat sy om haer opiniatreren/van haren vyandt qualijck souden getracteert worden. Laedenti parcere virtus. Gheduyrende de belegeringe/is uyt het Casteel door het hooft geschoten ende doodt gebleven le Vi-conte de Touars. Hier werdt oock de Heere van Ballagny, die naemaels Gouverneur van Camerijck gheworden is/door sijn been gheschoten.
Door dese victorien heeft de Hertoghe grooten lof ende eere ingeleyt/ende hy heeft veler herten daer mede gewonnen/ alsoo datter vele ordeelden/dat hy hier mede een goede proeve van sijn cloecmoedicheyt ende wijs beleyt in oorloochs-saken ghegeven hadde/ ende dat hy de Man soude zijn/die den Prince van Parma het hooft soude bieden durven. De Staten Generael ende de Prince van Oranien hebben eenige Gesanten [1581.] aen sijne Hoocheyt gesonden/biddende dat het de selfde woude ghelieven met sijn Legher dieper in Neder-landt te comen/daer toe sy haer volck onder het beleyt van den Prince van Espinoy in Vlaenderen veerdich hielden/om hem in't ghemoet te trecken/ende haer by sijn Leger te vervoegen: D'welck de Hertoge te doene wel gesinnet was/maer overmits de Winter voor de deure was/ ende sijn Legher meest bestaende was uyt vrywillige Heeren ende Edele/ die hem dese tocht te gevalle ghedaen hadden/de welcke hy niet langher conde by hem houden/alst haer selfs beliefde/ende sy niet ghesinnet en waren dieper in't landt te trecken: Oock dewijle daer eenich misverstant in sijn Legher geresen was tusschen de Edele / ende de Benden van Ordinantien/ van wegen de officien ende preferentie in de bedieninghe der hooge ampten: Soo en heeft hy met sijn gheheel Leger niet connen dieper in het landt comen/ende met een deel des selfden hem op den wech te begheven en was gheensins gheraden/ want de Prince van Parma / die in die Quartieren een sterck Leger by der handt hadde/soude hem stracx gevolcht ende geslagen hebben. Soo is den Hertoghe met sijn Leger nae Vranckerijck ghetrocken/ ende hy is met veel Fransche Heeren van daer overgescheept in Engelandt/voor de tweede reyse/alwaer hy den eersten Novembris aengecomen is/eerst bestelt hebbende/dat sijn eyghen Crijchs-volck onder het beleyt van den Grave van Rochepot door Cales lancx den Zee-strant in Vlaenderen tot der Staten Legher
trecken soude/ niet durvende passeren door Arthois/om dat de Prince van Parma daer so sterck lach/ende alle passagien besett hadde.
Principium fervet.
Auteursrechtvrij
