Een dapper schermutsinghe tusschen de Schotten ende de Spaenjaerden/ daer de Schotten d'over-handt behielden/ Anno 1577. In Ianuario.
[1577.] DOor dien de Spaenjaerden hare aenslaghen soo wel gheluckt zijn te Aelst / te Visnack/te Mastricht / te Antwerpen / ende op andere plaetsen/ende dat alcorts nae malcanderen/ soo zijn sy hier door soo moedich ende courageus gheworden/ dat sy met eenen dommen sin ende dol ghemoet eenighe stucken aenginghen/ die haer qualijck geluckten / weynich gedenckende op de oude Crijchslesse / Amat victoria curam: Voorspoet verheyscht sorghe. Ende wel warachtich hebben de oude gheseyt/ Qui de se praesumit ante quam pugnat victus est. Dat is/ Die stout en opgheblasen is van ghemoede, ende hem selven inbeeldt, dat hy groote dinghen can uytrichten door sijn eyghen cracht ende ghewelt, die wordt overwonnen eer hy te deghe aen het vechten comt. Nevens andere onbedachtsame ende verboeghde aenslaghen die de Spaenjaerden hebben aenghericht dulci fortuna ebrij, doe sy in haere meeste dertenheyt ende moetwille waren rasende en dollende / is desen mede eenen gheweest / die Anno 1577. in den beginne des jaers gheschiedt is by Luyck/ in een Dorp of Vlecke ghenoemt Iupile of Iupiliaen, alwaer een goet deel Schotten laghen/de Staten dienende/onder het gebiet ende beleyt van den cloecken Colonel Balfour, die van de [1577.] Spaenjaerden bespronghen zijn/ meynende de selfde alle gaer te overvallen ende om te brenghen: Maer de Schotten hebben haer soo dapper te weere gestelt/ dat sy de Spaenjaerden een goet deel volcx afgheslaghen hebbende / de reste op de vlucht brochten. Hadden de Spaenjaerden de Stadt van Mastricht niet te vriende ghehadt / die haer de Poorten opende ende in liet / haerder en soude niet een ontcomen zijn. Hier is soo dapperlijck gevochten / dat het scheen datmender vocht om de eere van de Schotsche ende Spaensche Natije: De Schotten hebben daer doen blijcken
dat sy Mannen van couragie zijn / ende dat der Spaenjaerden huyt soo weeek ende soo dunne is / als de hare / ende anderer. Dese victorie/ al hoe wel sy cleyne was / soo heeft sy nochtans nae der handt niet alleen de Schotten ghecourageert ende moet gegeven/ maer ooc alle der Staten Ruyteren en Knechten/ die nae desen beter stant ghegrepen hebben/als te vooren / nu voor seker houdende / dat de Spaenjaerden niet meer scheut-vry en zijn / als andere. De Hooch-duytsche verhalen ende beschrijven dit ghevecht seer aerdich / in hare Rijmen:
Nach dem etliche von den Staten
Den pas durch Luyck erhalten haten
Kummen de Spaenjarden als baldt
Ihnen ins gemut mit grosser gevvalt.
Dennen die Schotten ritterlich
Begegnen, und gar mannichlich,
Vnd geben ihnen guten Iohn,
Dus sie abziehen mit spot und hon.
Dan die Signori gaer verzaecht
Nach Mastricht mital irer macht
In grosser eil sind hin-gelauffen,
Sunst musten sie die haut verkauffen.
Auteursrechtvrij
