[1576.] Knechten van Fronsberghens/Fockers/ende Oversteyns Regimenten / die teghen hare eyghene Overste aenvoerende / op hoope van buyt. Oock quam hier by ten selven daghe Iuliaen de Romero met sijn volck van Liere: Daer quamen oock ten selven dage de Gemutineerde van Aelst/zijnde ontrent twee duysent sterck / ofte soo andere schrijven/ sestien hondert/ al onde Soldaten / wel ghewapent / al op hoope van buyt / niet teghenstaende / dat sy boven de veertich duysent Croonen van de Staten ontfangen hadden/ boden den buyt ende brandt-schattinghe / die sy te Aelst ende daer om heer ghemaeckt hadden.
Met dese Ghemutineerde / die Roda selfs voor Rebellen des Conincx hadde verclaert/hebben de Spaenjaerden / uyt het Casteel vallende/met een groote furije ende onversaechtheyt (nae dat sy Mariam, ende S. Iacob aengheroepen hadden) de Stadt van Antwerpen bespronghen/die den Coninck in alles ghetrouwe ende onderdanich was / doende sulcx als den Raedt van State (dien des Landts regieringhe by den Conincks was bevolen) haer belaste.
Jn het invallen der Stadt hielden de Spaenjaerden goede ordre / tot haren grooten voordeele / elck Regiment wetende wat straten ende quartieren het bespringhen soude / haere Hoeren ende Jonghers volchden haer cort achter aen / stroo draghende / om de huysen daer sy eerst aen quamen / stracx in brande te steken / om alsoo de Borgheren een schrick aen te jaghen / ende in disordre te brenghen. By Sint Jooris vonden sy den meesten teghen-standt/ alwaer het Gheschut haer langhe teghen hieldt.
Men bevondt de Waclen / die in der Stadt ghecomen waeren / heel onbequaem in de defensie deser Stadt/ als nieu ende rou wesende / de Stadt / straten / hoecken / noch wijcken niet kennende/ oock onachtsaem zijnde: Vele oordeelden dat de Borghers/ indien men haer by tijdts hadde ghemonstert / in ordre ghestelt / ende de wapenen in handen ghegheven [1576.] hadde / den vyandt beter alleen souden afghekeert hebben / als met dese vreemde onbedrevene Soldaten.
De Heere Champigni dede grooten vlijt ende neersticheyt om de Spaenjaerden te keeren ende uyt de Stadt te houden/ rijdende en loopende van den eenen hoeck tot den anderen/ dan de Walen / dan de Duytsche / die uyt vreese des Gheschuts haer niet en dorsten bloot gheven / maer de rugghe wenden ende ter Stadt in liepen / elcke reyse weder te rugghe brenghende / maer het was al te vergheefs/de Waelen en hielden gheenstant / maer Oversteyns Duytsche weerden haer tamelijck.
De Spaenjaerts vielen by de vijf straten uyt de pleyne over de trenche in de Stadt/ ende sy staken terstont eenighe huysen in brandt / ende sy wonnen d'eene strate voor/d'ander nae/ door dien dat de Soldaten malcanderen niet en vertrouden/ ende de Borghers de Soldaten mistrouden. Nochtans hebben de Spaenjaerden op verscheyden oorden en plaetsen mannelijcke teghen-weere ghevonden/ als onder anderen uyt het Stadt-huys / uyt het welcke de gheswoorene Ghilde-broeders dapper op haer schooten/ om het welcke te verhinderen/ soo hebben de Spaenjaerden dit seer schoone ghebousel in brande ghesteken / ghelijck sy oock aen veel andere orden de huysen aenstaken/ d'welck eenen grooten schrick den Borgheren aenbrachte. De Grave van Oversteyn/siende dat de Stadt verlooren was/meynde hem te salveren in een van de Schepen ofte Schuyten in den Vliet van het Oosters-huys liggende/maer springende van een Brugge/viel hy besijden/ende overmits hy swaer gewapent was/so verdronc hy. Champigni, de Marquis van Havre/de Marckgrave Goswijn Vaeck/en̄ veel andere vielen van den muyr des Bollewercx/genaemt den Cattenberg/en̄ geraeckten op des Princen
Auteursrechtvrij
