Gedichten. Deel 1

[p. LIX]

In yam fluvium carmine heroïco
Celebratum à Joanne Antonide Vergoesio, Poëtâ Ingeniosissimo.

TU, quae Teutonicum gradiens Regina per orbem

Despicis hostiles, Amsteli nympha, minas.

Cujus ad illustres assurgit Roma triumphos

Heröum domitô nobilis orbe domus.

Ergóne Caesareas olim retulisse tyaras

Et decus à ducibus commeruisse parum est?

Jam major tibi surgit honos, dum cingeris undis,

Et tuus in mediis Ya triumphat aquis.

Percutit indignis Tiberinus pectora palmis,

Et vetus extincto damnat honore decus.

Barbara quid jactas Nili miracula, Memphi?

Nomina fluminibus deperiêre suis.

En sylvas hic, Belga, tuas; distentaque ventis

Carbasa, & Amstelias, quas habet, Ya rates.

Fallor? an ex imis emergunt Najades antris,

Quaeque suos Nymphae deseruere thoros?

Vidimus in doctis natitantia numina chartis,

Et quibus antiqui non habuere fidem.

Magnificum veneramur opus: dum Musa stupescit,

Votaque vix vati concipit aequa suo.

Ne doleas afflicte Helicon, dum deficit alter

Cygnus, Agrippinae quem peperere sinus.

Alter adest, sectansque patrem jam passibus aequis

Ipse Maroneam provocat arte chelyn.

Viderat hoc alto latitans in flumine Triton,

Objicis ingenium quis mihi vatis, ait?

Bellerephontaeas Yam qui vertere in undas

Sic potuit, Phaebus, si velit; esse potest.

C. Brandt.

Ger. Fil.