Gründtlicher Bericht, ob Zauberey die argste vnd grewlichste sünd auff Erden sey

[p. 67]

Das I I I I. Capitel.
Die dritte special vrsach, der eyngerissene vnd täglich je länger je mehr eynreissender Zaubereyen: vnglaub vnd wicheley.

GLeich als durch vnwissenheit oder nachlässigkeit vnd vntraw beyderseits geistlicher vnd weltlicher Obrigkeit, gleich wie alle andere Sünden, also auch insonderheit das grewlich laster der Zaubereyen eyngerissen, vnnd allenthalben zugenommen: Also kommen auch nicht geringste vrsachen ausz dem menschen selbsten. Vnder solchen vrsachen, so ahn den Menschen selbst erfindtlich, ist der vnglaub nicht die geringste. Dann dieweil der glaub, vnd zwar der rechte vngefälschte Catholische glaub, das rechte vnd beste Schilt ist, damit vnd in dem man kan vnd soll ausz leschen die fewrige pfeil desz allerschalckhafftigsten: So kans nicht fehlen, welche keinen auffrechten Catholischen glauben haben, das dieselb leicht vom teuffel betrogen, vnnd balder als andere rechtglaubigen in allerley sünd, beuorab in die Zauberey verfürt werden. Vnd dieweil heutigs tags also vil Ketzereyen, vnd wenig Catholische rechtglaubigen seynd, ist es nicht wunder, dasz der teuffel den Zauberhauffen also stärcket, vnnd von den Ketzern, vnd falsch oder Aberglaubigen, sonst Zauberer vnd Zauberinnen machen kan, vnd dieselb gantz vnd zumahl in seine gewalt stürtzen. So ists auch vnleugbar war, das

[p. 68]

die superstition, wicheley vnd aberglauben treiben, vnd folgen, Gott grewlich erzürnen, vnnd dem teuffel lieb vnd gefallens thun, ja dem teuffel dienen, seinem raht vnd eingeben, zu höchster schmach Gottes, vnd wider das erste vnd zweite gebott tödtlich sündigen. Durch solche wicheley, vnnd vom teuffel oder seinem zauberischen, oder wahrsagerischen, teuffelischen anhanck erdichte vnnd practisirte, aberglaubische dingen, kommen die Menschen ahnfangs ins teuffels hoff, in seinen gewalt vnnd stricken, bisz lang sie je lenger je mehr, von Gott, ihrer wicheley halben verlassen, in allerley vnglaub, vnd letzlich in die Zauberey als durch sichere grad vnd trappen gerathen, vom kleinen zum grossen: welches nit geschehen seyn würde, da sie nicht zuuor durch schwach oder vnglaub oder sonst allerley wicheley vnnd aberglaubische stücken, dem teuffel zu hausz gangen weren. Was aber superstition vnd aberglaub vnd wie mancherley derselb sey, besihe Bensfeldium de Confessionibus maleficarum, Von der Bekantnusz der Hexen. Vltimo prẹludio, de caussis dispositiuis ad crimen male ficorum, sol. 26. & sequentib. in dem verteutschten Exemplar, vnd lodocum Lorichium in seinem Büchlein zu Freiburg getrückt, vom Aberglauben.