Gründtlicher Bericht, ob Zauberey die argste vnd grewlichste sünd auff Erden sey

Das V. Capitel.
Die vierte special vrsach warumb etliche zu Zaubern werden: vorwitz, vnd rath bey warsagern vnd Schwartzkünstler suchen.

[p. 69]

ALs der tausentkünstler der Hellische feind ⁺ etliche nicht kan durch vnglaub, oder wicheley zur Zauberkunst bringen: bewegt vnnd treibt er vil darzu durch curiositet vnd fürwitzigkeit, das die Menschen fürwitzig wöllen alles, oder solche ding wissen, welche zu wissen vnnöthig, vngepürlich, oder schedlich seyn. Daher die jenigen so wöllen verborgen oder zukünfftige ding wissen, vnd natürlich vnd mit Gott nicht wissen können, durch hilff oder rathfragen des teuffels, oder sonst teuffelische verbottene mittel, entweder zu teuffelischen warsagern vnd schwartzkünstlern, oder sonst zauber vnd zauberinnen werden, durch gifftung des teuffels, der die jenige, welche seines raths oder hilff gebrauchen neben andern tödtlichen vnd verdamblichen lastern, letzt zu dem allerschentlichst vnd schröcklichst, der Zauberkunst, vnnd das sie sich samen ins teuffels gewalt begeben, bewegt vnd stürtzet.

+ Besiehe Benszfeldium von der Bekantnusz der Hexen, fol. 35.