Gründtlicher Bericht, ob Zauberey die argste vnd grewlichste sünd auff Erden sey

Das X I I I I.Capitel.
Die getauffte Zauberer vnd Zauberinnen, seynd ärger einige Hurer.

1. Die Hurer vnd Buler sündigen groblich vnd verdamlich, aber gleich menschen mit menschen, vnd loszledige personen vndereinandern:

Die zauberer vnd zauberinnen die sündigen mit den teufeln, Gottes vnd des menschlichen geschlechts abgeschworen vnd ertzfeinden.

2. Die Hurer die sündigen ausz schwacheit, oder anstifftung des fleischs, verleugnen gleichwol Gott nicht, noch verbinden sich dem teuffel ex professo:

Die Zauberer vnd Zauberinnen, die haben zugleich Gott verleugnet, vnd sich dem teuffel ex professo ergeben, vnd thun alles Gott zu trutz vnd dem teuffel zu lieb vnd ehren.

3. Die Hurer gedencken nit andere zubeschedigen oder zuuerderben:

[p. 31]

Die Zauberer vnd zauberinnen neben ihrer allerschentlichsten vnkeuscheit, so sie mit dem teufel treiben on vnderlasz, so seynd sie doch Gottes vnd der Menschen feind, vnd darauff ausz, vnd dem teuffel vereidet vnd verpflichtet, Gottes ehr vnd willen zuuerhindern, vnd andere entweder zu des teuffels reich zu ziehen, oder sonst als viel sie können an leib, ehr vnd gut, auch der seligkeit zubeschedigen, vnd nichts dann nur bösz zustifften, zu ehren des teufels der ein vrsach vnd anfänger, liebhaber vnd befürderer alles böses ist.