Gründtlicher Bericht, ob Zauberey die argste vnd grewlichste sünd auff Erden sey

Das X I I I. Capitel.
Die Zauberer vnd Zauberinnen seynd ärger als einige Mörder oder Todtschleger.

1. Mörder vnd Todtschläger dieselb bringen einen eilend vmbs leben, alsbald sie können, also das einer offt in einer halben, ja viertheil vren, oder kurtzer stirbt:

Die zauberer vnd zauberinnen die thun iren neben Christen einen langwirigen harten todt an, also das einer von inen bezaubert, offt etliche Monat, Jar vnd tag, oder auch wol etliche jar quelet, auch weder sterben noch genesen kan, vnd also wol zehen tod leiden musz.

2. Die Mörder vnd Todtschläger tödten nur den leib souil an inen ist:

Die Zauberer vnd Zauberinnen seind darauff ausz, vnd verschuldens auch, das mancher ausz der langwirigen kranckheit, vngedultig, miszmütig, oder zur Gottslesterung getriben,

[p. 29]

oder sunst bey andern Warsagern, Zauberer, Teuffelskünstnern raht sucht, vnd also an Gott trewlos, meineidig, vnd demnach an der Seelen mit getödtet, vnd offt auch, da er ohne pusz abstirbt verdampt wirt, vnd also zeitlich vnd ewig, an leib vnd seelen verloren vnd getödtet wirdt, das ich geschwige allerley andere mit einlauffen den todtsünden, als argwohn auff vnschuldigen, hasz, nachrede, rachgirigkeit, vnnd dergleichen.

3. Ausz vnglück hästigem zorn, oder wegen erlittenes vnrecht, oder sunst verhoffter nutzung, kompt mancher zum todtschlahen, vnnd das er ein Mörder wirt:

Die Zauberer vnd Zauberinnen die mörden vnd tödten ausz fürsatz, auch da sie kein action auff haben, vnd kein profeit von gewarten, ausz antreibung, vnd zu dienst des leidigen teuffels.

4. Die Mörder, ob sie gleich auch Gott nicht lieben als sie ihren nechsten mörden vnd offt ausz hasz ihres nebenmenschen, zum mord getriben werden, so thun sie es doch gemeinlich nicht ausz hasz vnd zu trutz Gottes:

Die Zauberer vnd Zauberinnen, die thuns nicht allein ausz hasz ihres nechsten, sonder gemeinlich ausz antreibung vnd zu lieb des teufels den sie zu ihrem Abgott angenommen, zu trutz vnd hasz Gottes, den sie ex professo verlassen vnd verleugnet haben.

5. Die Mörder vnnd Todtschleger ob sie wol Gott verzürnen, vnnd de facto verleugnen, so

[p. 30]

thun sie es doch nit ordinariè, das sie Gott sonst samen vnd gentzlich, oder ex professo verleugnet, oder sich dem teuffel ergeben haben. So haben sie auch kein fleischliche gemeinschafft mit dem teuffel:

Die Zauberer vnd Zauberinnen aber die thun was sie thun ausz dem bund vnd zu lieb des teufels, der ir abgott vnd bulierer ist, damit sie ihre verfluchte, fleischliche vnkeuschheit treiben, dem sie auch sich mit leib vnd seel ergeben haben.