Gründtlicher Bericht, ob Zauberey die argste vnd grewlichste sünd auff Erden sey

Das X V.Capitel.
Die Zauberer vnd Zauberinnen seynd ärger als incesti, das ist, einige Bludtschender.

Eine grewliche vnd erschröckliche vnkeuscheit ists, wann ein bruder mit seiner schwester, ein vatter mit seiner tochter, ein son mit seiner leiblichen muter bulirt, oder der gleichen vnder den nechsten blutsuerwanten die fleischliche vermischung vnd vnkeuscheit begangen wirt, aber gleichwol seyn fieselben nit so bösz, als die zauberer vnd zauberinnen. Dann die Blutschand begehn, seynd vndereinander Menschen:

Die zauberer vnd zauberinnen, vermischen sich, vnd treiben vnkeuscheit mit dem teufel.

2. Die Blutschender haben Gott noch nicht gantz abgeschworen, vnd dem teuffel sich offentlich vnd gentzlich verbunden:

Solchs haben gethan die zauberer vnd zauberinnen.

[p. 32]

3. Die Blutschender was sie thun, geschicht ausz schwacheit vnd böszheit des fleischs:

Die zauberer vnd zauberinnen, treiben solche Vnkeuscheit mit dem teuffel, nicht allein ausz schwacheit vnd boszheit desz fleischs, sonder auch zu trutz Gottes, vnd zu ehren vnd dienst des teufels als irem bulen vnd abgott.

4. Die Blutschender fallen nach dem glauben nicht allerding ab:

Die zauberer vnd die zauberinnen, verlassen vnd verleugnen den gantzen glauben.

5. Die Blutschender schenden vnd beschedigen sich selbs an ir Leib vnd Seelen:

Die zauberer vnnd zauberinnen beschedigen darneben auch ihren nechsten, vnd jedermeniglich, wen sie können.