Gründtlicher Bericht, ob Zauberey die argste vnd grewlichste sünd auff Erden sey

Das X I. Capitel.
Das die Zauberer vnd Zauberinnen ärger seynd als parricidae oder matricidae das ist, die ir eigen Eltern, oder Kinder, oder sunst nechste blutuerwandten mörden.

1. Welche ir eigen Vatter oder Mutter, weib oder Kinder, Schwester oder Brüder, oder sonst nechste Bludtsuerwanten vmbbringen, wider die natur vnd recht, mörden, die bringen sie leiblich vmb, vnd verkürtzen inen das natürliche leben:

Die zauberer vnd zauberinnen, die thun desz gleichen auch, entweder ausz gefaszter boszheit, (weil sie keine Göttliche, auch keine recht natürliche liebe haben, sondern gleich als Gott, also auch die Menschen, die Gott dienen, vnd nicht mit ihnen sich dem teuffel ergeben wöllen, hassen) oder ausz zwanck vnd antreiben des teufels, den sie zu gehorsamen sich wissentlich verpflichtet, wie solchs die erfahrung vnd viler bekandtnusz auszweiszt vnd bezeuget: aber dise thun gemeinlich einen langwirigen schwerlichen todt

[p. 26]

an, mit irem zauberischen gifftigen fenin, das einer nützlicher sonst zehenmal mit dem schwert, oder andern instrumenten eilendt getödtet würde.

2. Die Eltern oder Kindermörder die tödten sie leiblich:

Die zauberer vnd zauberinnen, da sie können, opffern sie ire kinder, wann sie geborn, den teuffel, vnd bringen sie vmb ehe sie getaufft, vnd tödten sie also an leib vnd seelen, zeitlich vnd ewig.

3. Die sonst ausz menschlichen zorn, oder böser meinung ire Eltern, oder kinder vmbbringen, thun solchs leiblich, vnd gemeinlich nit der meinung sie auch dieselb dem teuffel gedencken zuubergeben, oder ex proposito, des Himmels zuberauben, oder in die verdamnusz zustürtzen:

Die zauberer vnd zauberinnen tödten ire kinder principal dem teuffel zu lieb vnd ehren, fürnemblich darumb, das sie dieselb Gott abstelen vnd dem teuffel vberlifern, des himmels berauben, vnd mit sammt inen selbst in die ewige verdammnisz stürtzen wöllen. Vnd ob gleich die zauberer vnd zauberinnen nit ire kinder oder blutuerwanten jederzeit am leib de facto tödten, so seyn sie doch gemeinlich jederzeit darauff ausz, dasz sie dieselb von jugent auff, oder so bald sie können, zu dem teuffel vnd in des teuffels gewalt bringen, vnd darzu bewegen, oder auch mit vilfeltigen schmeichel oder drew worten, oder sonst harten streichen vnd schlegen bezwingen, das sie auch Gott abgehn, den teufel zum Herren vnd bulen annemen, vnd also nit allein sich selbst an leib vnd seel töden, sonder auch

[p. 27]

andere dergleichen beschedigen vnd betrüben, welches vil, ja hundertmal ärger, als seine Kinder strack am leib mörden, darnach sie andern, noch inen selbst ferners nit schaden, oder ire verdamnusz, oder auch zeitliche schand vnd straff vermehren oder verschulden können.