Gründtlicher Bericht, ob Zauberey die argste vnd grewlichste sünd auff Erden sey

Das X. Capitel.
Die Zauberer vnd Zauberinnen, seynd ärger als die Sodomiter.

1. Die Sodomiter waren Heiden vnd vnglaubigen, ⁺ wuszten von Gott vnd seinem gebott nit, vnd dieselb haben weder die natur vnkeuschheit getriben, männer mit mannsz gleich, &c.

Die getauffte zauberer vnd zauberinnen seyn Christen, wissen von Gott vnd seim wort, wissen wie schentlich vnd verdamblich solche sünd vnd vnkeuschheit sey, welche wider die natur geschicht.

2. Die Sodomiter hatten mit Menschen vnnatürliche Vnkeuscheit getriben:

Die zauberer vnd zauberinnen die bulen mit dem teuffel selbs. Nun ists schentlicher vnd grewlicher sünd, mit dem teuffel, Gottes vnd vnserm Erbfeind, in menschlicher gestalt bulier, als mit einem andern menschen, obs gleich wider die natur vnd vnordenlich beschicht.

3. Ja wanns gleich andere getauffte Christen weren, die Sodomitische Sünd begiengen wider die natur, ein mannsperson mit dem andern oder sonst vnnatürlicher weisz sich mit andern menschen, ja auch, das noch grewlicher, mit beesten vermischen, so ists ein vberausz grewliche, schendliche

+ Gen. 19.

[p. 24]

in Himmel wraach ruffende Sünd, die man sunst auch eine stumme Sünd nennet, dieweil man der nicht, wegen grewel melden soll, vnnd allsolche Sünd den Menschen in der Beicht, vnd sonst gemeinlich thut verstummen, dasz er nicht recht beichtet.

Gleichwol sündigen die zauberer vnd zauberinnen noch vil schwerlicher, dann dieselb mit dem teuffel selbst in ahngenommener menschlicher Manns oder Weibsgestalt wissentlich buliern, vnd vnerhörter vnkeuschheit zur höchster vnehr vnd schmach Gottes betreiben.

4. Andere Christen so in Sodomitische sünd fallen, thun solchs gemeinlich nicht ausz einem bund den sie mit dem teuffel expreszlich vnd ausztrucklich gemacht: haben sich auch nicht jederzeit dem teuffel vnd der Sünd mit Leib vnd seel vbergeben, ob wol sie solchs ausz geilheit des fleisches vnd anreitzung des teuffels thun:

Die Zauberer vnd Zauberinnen die treiben solche teufflische, schendlichste, vnd allerschröcklichste Sodomey, ausz dem Bund den sie mit dem teuffel gemacht, vnd weil sie sich dem teuffel mit leib vnd seel zusamen vbergeben haben.

5. Andere Christen so in sünd der Sodomiter gefallen, seind nicht alle vorhabens in solchen Sünden zuuerharren, sonder vil gedencken sich noch zu beichten, zu bessern, vnd abzulassen: wie wol die wissentlich vnd auffsetzlich solche Sünd in reiffen vnd verständtlichem alter offermalen begehn, selten, oder schwerlich sich recht beichten vnd bekeren:

[p. 25]

Die zauberer vnnd zauberinnen aber gedencken sich immer zubekeren, oder abzulassen, sonder immer für vnd für, als lang sie leben in solcher teuffelischer, grewlichster Sodomey vnnd Vnkeuschheit zuuerharren, vnd mit dem teuffel zu bulieren.