Watapana. Jaargang 4

[p. 18]

H. Habibe:
Kén tabatá César Augusto Sandino?

César Augusto Sandino a nase na 1895 na Nicaragua. Tempo ku el a bai buska trabòw na un plantashón di banana di United Fruit Co., el a sera konosí ku e realidat doloroso di, kasi bende por bisa, e skiavitut den kwa su kompatriotanan tabatá biba. Poko luna despwés ku el a haja trabòw, nan a deklará un wèlga, pasobra e polísnan privá di e empresa merikano (United Fruit Co.) a asesiná un di e plantadónan di banana. Nan a koi Sandino preso, dun'é un kastigo i kit'é despwés foi trabòw. Djèi é ta bai na un pweblo chikito, Quiroga, Guatemala, i bòw di un nòmber falso é ta logra haja trabòw na e úniko lugá posíbel: tajérnan mekániko di United Fruit Co. Ei é ta keda te 1923.

Despwés é ta sigui pa México. Tres aña é ta biba na Tampico, trahando bòw di tera den mínanan di Huasteca Petroleum Co., i asimilando ideanan nobo den e ambiente kaminda aínda bos i mensahe di Emiliano Zapata ta den airu.

E tempo èi, 1926, e ‘marines’-nan ta ultrahá Nicarugua ku un okupashón militar. César Augusto ta subi den séronan i fo'i riba La Segoviana é lo bringa, kwáter aña largo, e 14.000 sòldánan di e marina merikano i e ‘forsanan nashonal’ di e oligarkía. Bòw di e sirkunstánshanan aki é ta haja e nòmber di ‘General’.

E pweblo di Nicaragua ta keda babuká di indignashón ora é tende di e pakto (‘Bryand-Chamorro’) ku ta rekonosé ‘derechonan’ di U.S.A. pa intervení den asuntonan interno di Nicaragua, asta mediante akshón di su trópanan. Sandino ta papia ku e trahadónan di e zona minero di San Albino i é ta exponé un plan pa lanta un grupo armá ku por aktwa riba su mes... I é ta pensando kaba riba e apojo ku é lo haja di México. Pero ora é baha fo'i e sero pa kuminsá su bida di sòldá líber, ta solamente nwebe hòmber ta kompañ'ele. E ‘ehèrsito’ chikito ta wòrdu reforsá despwés ku 20 hende más, ku ta bini di un plantashón di e United Fruit Co.

Algún muhé di bida ta juda Sandino hòrta skopèt i munishón pa arma 100 guerijero. Ora ku Sandino bolbe ‘Las Segovias’ ja é ta hefe di un grupo di 300 hòmber armá. Den nan tin, tambe, mucha di 13 à 15 aña i trahadónan.

Sandino ta drenta Jinoteca, kaminda 800 sòldá di e kabajería di Gobierno ta habri paso pa e ehèrsito di Sandino, despwés ku esaki a mata e héfenan. Ora ku ‘El Aguilucho’ risibí un mensahe di kapitán Hatfield - di e trópanan merikano - den kwa nan ta bis'ele ku nan ta dun'é un plaso di 48 ora pa é entregá su mes, é ta konstestá: ‘Está bien, iremos a entregar las armas, pero han de quitárnoslas cuando hayamos muerto’.

Día 19 di september di 1928 é ta konkistá Telpaneca, matando e ‘yankee’-nan ku tabatá okupá e lugá. Na otro partinan, tambe, e merikanonan ta ser derotá. Despwés di e derota di Las Cruces (1929), U.S.A. ta buta su aviashón disponíbel

[p. 19]

pa kuminsá bombardiá diariamente e posishónnan di e ‘Ehérsito di hendenan líber’ i tambe e lugánan sivil di retagwardia.

E enemigo su intenshón tabatá kòrta e transporte di alimento i kibra asina e moral kombatiente di e trópanan di Sandino. Pero e ex-obrero ta revelá su mes komo un bon estratega. Dos día largo e oroplanonan ta blo bombardiá pòpchi bistí ku ünifòrm di sòldá di Nicaragua. Ora ku esájanan ripará ku ta riba pòpchi nan tabatá tira, ja e guerijeronan di Sandino a laga tumba kaba den direkshón di Jinoteca. U.S.A. ta kuminsá komprondé ku nan tin ke-aber ku un patriota ku ta alimentá idéanan di un revolshón sosial à lo mexikano, manera esún di e indján Emiliano Zapata, ku nan a mata poko aña antes. Despwés tin un etapa di ‘alto el fuego’ ku ta dura más o menos un aña. Sandino ta bai México pa buska ajudo i pa mira pa su salú drecha. Promé di Mèi, 1930, é ta bolbe serka su hendenan i guera ta kuminsá atrobe. Un aña despwés, 1931, Sandino ta bandoná Longtown, ku ta keda sembrá di kadáver merikano.

Poko poko su ehérsito ta sigui krese te jega un kantidat di 5000 hòmber. Na aprel, 1932, varios kombate ta tuma lugá i e ármanan kriojo ta sali viktorioso kasi tur biaha. Na jüni e guera ta baha fo'i séronan den e valèinan di banana, den e región parti panòrt di e país. Sandino tin na su fabor e enorme majoría di e poblashón i, naturalmente, e masa di hédenan póber ku ta mará na e kompanía di United Fruit Co.

Na desèmber e ‘marines’-nan ta sali fo'i Nicaragua. Pero nan ta laga algún representante atrás: Sacasa, Moncada i Somoza, kendenan lo kometé e asesinato di Sandino.

Un anochi, 21 di februari di 1934, na kaminda di stat pa fligfèlt e kamión ku tabatá hiba Sandino, hunto ku su generalnan, a para na un kruse solitario....

Poko día promé, Sandino a disidí di baha fo'i séronan pa trata un asunto ku Sacasa, na Managua (kapital di Nicaragua). El a preferá di aparesé sin ningún ostentashón i sin penetrá e kapital ku su ehèrsito, konfiando ku e país lo por subi ariba un mihó kaminda, den direkshón di otro fórmanan di bida.

E anochi èi tur e lusnan di e palèis di e presidente (Sacasa) a sende, riba e bunita lago di Managua, pa risibí Sandino. Durante e tres o kwáter díanan promé nan a negoshá tokante e base pa un akwèrdo. E ‘hòmber líbernan’ lo desarmá nan mes poko-poko i nan lo drenta den e bestür komunitario. Gobièrno lo permití nan pa importá libremente nan mashínnan pa traha na kunuku i é lo duna nan krédito espesial. Pero e plannan di Somoza, Sacasa i Moncada tabatá otro: mata Sandino. Na e brindis final di e akogida tabatá presente ‘Tacho’ Somoza, ku lo bira diktador di e país (te ora ku nan mat'ele 30 aña despwés).

César Augusto, kende su amigonan a tah'ele i a spièrt'ele pa e konspirashón, sin ku nan a logra konvens'ele pa sali fo'i e país, ta sinti su mes felís, ora ku el a dispidí di Sacasa. El a kere ku ta e pas di su tera el a sigurá, pero loke el a hasi tabatá konfirmá su sentensia di morto. Nan a ataká e kamión, Avenida Roosevelt. ‘Dios salve a Nicaragua!’ Sandino a grita, ora ku supteniente Monterrey a tir'ele mata.

Somoza a tuma poder i a someté e país sentro-amerikano pa hopi tempo...

(fragmento di ‘La primera acción guerrillera americana del siglo XX’; tumá fo'i ‘lndice’, Aña XXIV, oktober 1969)