Un dia
Awe mi ta presentá Bo, kerido lektor di ‘Watapana’, algún poema fo'i mi kolekshón ‘Un dia’ ku ja a kumpli nan promé lustro di existensha sin ku nunka nan a mira solo, es desir, majoría di nan.
Mi ta kòrda, ku na prinsipio di 1967, mi a manda un tròshi di nan pa ‘Sticusa’ i ku e fundashón kultural aki a enkargá su mes ku nan publikashón.
‘Sticusa’ varios biaha a aserká ‘Stichting Antilliaanse Literatuur’, ku ta konsiderá komo su tarea pa juda òwtornan antijano ku publikashón di nan obra, pero sin resultado (según un karta di ‘Sticusa’ di 3 di jüli di 1968).
Na februari di 1969 nos mes a fasilitá i entregá e poémanan den skochi di ‘Stichting Antilliaanse Literatuur’ pa mediashón di Sr. H. Booi (Aruba). Atrobe sin resultado.
Ata algún di nan aki den klaridat di Watapana!
Mi ta kòrda kon Nicolas Piña - un atardi di 1966 den su beranda - tabatá bisá mi ku e imagen di ‘un paña blanko riba kar'i Hooiberg’ (poema ‘Pesimismo’) a but'ele pensa riba e pañanan ku ta kologá den solo banda di su kas na Tarabana. Pero mi paisahe, esún di e poema ‘Pesimismo’, no ta un paisahe den solo, manera lektor lo por komprondé.
Ta un sintimento melankóliko, un impreshón di morto, ku tabatá tembla den mi espíritu despwés ku ‘winter’ a transplantá kurasón di Hulanda i jena espasio ku un ambiente di chumbu i èis.
Den tur e friw di Hulanda, tambe, mi kurasón a kima, tin biaha, den kandela di un deseo (e poema ‘Deseo sin fin’).
Mi no sa kiko lektor lo pensa di su forma. Chikito? Apnormal? No ta un forma mucho tradishonal, kisás, pero e kontenido, e fondo, no tabatín mester di un bistí largo pa bai resèpsi. E tema ta parse loke Elis Juliana a transformá den ‘Canta Clara’ (un poema largo épiko-líriko) o por ehèmpel e mesún deseo profundo ku Pierre Lauffer a karisiá den su ‘Ju pretu’ (Kwenta pa kaminda), pero den un forma más kompakto i kargá ku tenshón.
Pa e momento akí, nada más tokante ‘Un día’.
Henry Habibe
Auteursrechtelijk beschermd