Watapana. Jaargang 3

[p. 5]

Kantika di mañán

Si mi bos bira mecha di petrolio
pa mi sende mil lamento di obrero,
ta pasobra mi kantika ta djawe
i mi tera no tin tanto awasero.

Mi tera sémper tabatá hamaka
di héndenan fo'i klímanan norteño;
sémper bai nan a pasa i bira gordo
drumí den su plant'i man petrolero.

Nan a mancha su kara, skonde e rosa
di su entraña i e flor bòw'i su kwero,
trapa tur su amor, skupi den su alma
i kana saboriá su sangramento.

Ma mi ta kanta ku lus di mañán
(i n'tin forsa pa kibra mi tormento)
ku watapana lo habri su wowo,
kobra brío, i lanta mira shelo.

Ku mañán riba mi frenta m'a dera
e último Caribe, i tambe keho
di Katibu a somentá den santana.
Faha kurpa, rumán, ban subi sero!

Tin rósanan ta kima di speransa,
lus di solo ta marka nos sendero,
kadushinan ta karga nos òwrora
i viktoria ta plamá te den shelo!

Henry Habibe