Ware verthooning ende afbeeldinghe van eenen dooden ende meest half verrotten vis, door die zee aen der strande op gheworpen, den 20. der maent September, anno 1608. was lanck ontrent 20. voeten

ende lach tusschen Catwijck ende Schevelingen by den Hage in Hollandt, met die beduydenis daer van, hier ouer verclaert. Aenwijsende den standt ende conditie des conincx van Spaignien ende sijn bedroch inden wtganck van desen vrede-handel gheopenbaert

[19 December 1601]

Iten inden Iare 1601. op den 19. December, ontrent Wijck op Zee is oock gestrant eenen grooten Potwalvis lanck 63. voeten, ende 38. voeten dick, hebbende ooc het backhuys vol gheweldighe tanden. Is int selve iaer oock niet gevolcht het grouwelijck ende fortsich belech der stadt Oostende in welck belech so buyten als binnen ouer de 150000. menschen gebleven zijn, wat stouter ende geweldiger storm (die spaensche Leviathans) van buyten der strande op die stadt ghedaen hebben is niet veel ghehoort, aldaer wel 1200. Mannen inden storm van buyten doot bleven, evenwel niet teghenstaende dat den Coninck van Spaignien naer meer als dry Iaren belechs de plaetse verouert heeft, maer nochtans niet te min, is dit die rechte harde strande gheweest, op welcke den grooten Spaenschen Coninck ende Leviathan hem te bersten ghesmeten heeft, sijne middelen, volck en tijt geconsumeert, heel Vlaenderen verarmt ende wtgheputtet, ende het herte sijner Ondersaten verloren, ende eyntlijck in plaetse van een bequame zee-haven ende stede, niet anders dan een verwoesten steen-hoop ende mols-hoop becomen heeft, aldaer hy inde wallen mochte sien ende vinden hoe dat sijne goude Pistoletten ende Spaensche Doublons in ysere vallen ende wallen verandert waren, niet tegenstaende dat hem de Italiaenschen Wisselaers Meester door sijne pracktijcke meynde te helpen ende sijne tanden meynden te verscherpen, maer eyntlijck werden beyde op dese oostersche strande ghemorselt ende te borsten gheworpen.

Al hier siet ghy nu claerlijck, hoe, ende deur wat middel desen grooten Spaenschen Leviathan tot sulcker ghestaltenisse ende mismaect ellendich Corpus gheworden zy ende also van langher hant gecorrumpeert ende sijne tanden ende hoornen in verscheyden male, op die strande Godes in stucken gestooten ende gemorselt heeft, so dat hem daer deur het kinnebacken als ydel geworden is, de tanden wtghevallen dat ten laetsten hem de navel verrot is, ende sijne lendenen (als den onmachtighen ende op sijnen vleeschelijcken arm vertrouwenden behemot) ontbloot staen, boven dien dat hy sijne tonghe tot meyneedt, leughenen ende laster misbruyckt, ende hem selven daer door alsoo stinckende by alle natien der Werelt ghemaeckt heeft.

Oft wy dan (segh ick) soo heel buyten redene hem by desen vuylen stinckenden dooden Vis moghen vergelijcken, niet dat wy hem soo cleyn achten, ten aensien sijnes Ampts ende beroepinghe d’welck hem van Godt gegeven is, noch oock in sijne Thresooren ende mogentheyt van rijcken, hoe wel ten dien aensien, hy selfs bevonden heeft dat hy daer met hem selven oneer ende stinckende fame ghecocht heeft. Ick swijghe

[p. B1r]

dat hy hem door de selve als een middel der zegeninge daer van soude verlost hebben, maer wy spreken hem aen inder gherechticheyt Godes, dat hy veel meer een Neros stinckende Monster, als een wel rieckende ghesalfde Coninck gelijck is, namentlijc dat hy hem selven door sijne vermetentheyt daer toe gebracht heeft, ghelijck Godt de Heere tot Iob spreeckt vanden Behemot, Siet (seght hy) hy slict den stroom in hem ende en achtet niet groots, hy laet hem duncken dat hy de Iordane wt wilde suypen met sijnen monde, nochtans vangtmen hem met sijnen eygenen oogen, ende door val-stricken doorboortmen hem sijnen neuse.

Wy hopen door Godts ghenade dat wy sien sullen dat hy hem selven sal door sijne eyghene oogen noch meer ghevangen vinden, ende die val-stricken die hy ons doort voorstel des bedriechlicken Vrede-handels meynt om den hals te werpen, hem selven daer mede sijnen neuse sal doorboort vinden, dewijle hy ooc niet naer den raet Godes, naer der gherechticheyt ende naer der waerheyt luystert, die daer spreekt Sapi 6. Soo hoort nu ghy Coninghen merckt ende leert ghy Rechters op der Aerden, vvant u is de overheyt ghegeven vanden Heere, ende dat ghewelt vanden Alderhoochsten die welcke vraghen sal hoe dat ghy handelt ende vereyschen wat ghy ordineert, want ghy zijt sijns Rijcx Amptlieden, maer ghy en bedient u Ampt niet fijn, ende en doet geen recht naer dien de Heere gheordineert heeft. Hy sal gantsch grouwelijc ende corts ouercomen, ende daer sal een gants scherp Oordeel over de over Heeren gaen, vvant den slechten gheschiet ghenade, maer de ghevveldige sullen ghevveldelijck ghestraft worden, met u tyrannen (spreke ic) op dat ghy vvijsheyt leert ende dat het u niet en faelgere.