[24 Februari 1598]
Wat Augurie oft verborghen Prophetije is dit gheweest, arriveerde niet dat selve Iaer, ende inde selfde maent op den 24. dach Februari een Vlote vanden Coninc van Spaignien sterck 38. schepen, brenghende int lant 4000. Spaigniaerden, tot dienst ende behoeve van den nieuwen Cardinael en Spaenschen Gouverneur, die oock dat Iaer te voren een dochter om haers gheloofs wil int sant heeft laten delven, maer hoe diep sy daer in lach en is maer al te wel ghemeten. Dese voorsz. Vlote Schepen quam onder het beleyt van eenen Don Zanchio Leyva des welcken Commissie was niet te slaen, maer het volck te landen, al soudemen de schepen stranden, d’welck oock ten deele gheschiet is, doch niet te min wert een van dien by de Hollanders genomen diese besprongen, daer op gevanghen werden 150. Spaensche Soldaten, de reste vant volck zijn meest aen lant gecomen, ende de schepen vergaen, niet teghenstaende dat sy 14. vande grootste tot Oorloch schepen meynden toe te reeden.
Is oock niet in dat selve Iaer den grooten Admirant van Arragon met gheweldige macht ghecomen, om de vereenichde landen van alle canten te bespringen, maer door Godts ghenade heeft hem te bersten gheloopen, ende sijne macht ghebroken op die neutrale landen ende stranden, teghens de welcke hy gheen vyantschap en hadde noch eenighe heerlijcke victorie daer by verwerven mochte eyntlijck heeft alsoo sonder vrucht te doen, de macht des Conincx van Spaignien ghebroken, ende sijne eere vermindert, ende is alsoo op die machtighe stranden Godes naer sijn rechtveerdich oordeel gheplettert worden.
Auteursrechtvrij