Ware verthooning ende afbeeldinghe van eenen dooden ende meest half verrotten vis, door die zee aen der strande op gheworpen, den 20. der maent September, anno 1608. was lanck ontrent 20. voeten

ende lach tusschen Catwijck ende Schevelingen by den Hage in Hollandt, met die beduydenis daer van, hier ouer verclaert. Aenwijsende den standt ende conditie des conincx van Spaignien ende sijn bedroch inden wtganck van desen vrede-handel gheopenbaert

[17 September 1566]

In den Iare 66. op den 17. dach der Maent September, is een verschrickelijck,

grouwelijck ende wonderlijck Monster van eenen Vis, op die zee strande by Scheveringh ghevangen, hebbende den beck als eenen uyl, het hooft heel verwerselt, daer op stonden 10. groote hoornen door malcanderen gegroeyt als Rams hoorens, op die selve hoorens waren gefigureert, ende alom doorsaeyt, merckelic gesneden ronde schotelkens als bedelaers schotelen, of lasarus nappen, soomen die noemt, de steert was hem

[p. A3v]

als een Papen ofte Iesuiten Cruys mutse ghestelt, soo ick daer van de Figure (inder tijt ghesneden, ende in druck wtghegaen) ghesien hebbe heeft dit Monster niet naecktelijck wtghebeelt het ghene corts daer naer ghevolcht is. Want ter liefden van dat ghehoornde Roomsche Beest, wildemen de Inquisitie inde Nederlanden tegens hare rechten ende Privilegien in voeren, den Adel ende Ridderschap om dat sy haer verkonden met goet ende bloet de vryheyt des Vaderlants te verdedighen, ende daerom met requesten hare ghetrouwicheyt ende dienst voor den Coninck presenteerden, daer beneffens claechden over de tyrannighe ende wreede Placcaten, werden daerom de selve niet voor fielten, bedelaers, ende Geusen ghescholden ende tot teecken, dat sy om de eere des Conincx, (maer niet om die Spaensche Inquisitie) geerne verachtingh wilden lijden, soo terstont alle de gheconfedereerde Edelen ende Staten droeghen geborduerde schotelkens op den hoet, oft op den mantel, oft op de mouwen droeghen oock Goude ende Silvere medaillien aen den hals op d’een sijde ghefigureert het beeldt des Conincx, op d’ander sijde een trouwe, houdende eenen bedel-sack met dese letteren omschreven: Den Coninck in als ghetrou tot den bedelsack toe. Waer van sy tot noch toe den name van Geusen behouden hebben: hoe die Nederlanden t’zedert van de Spaensche hoornen zijn ghestoten geweest, dat die Edele als lantloopers ende bedelaers moesten vluchten ende dat door raet ende toedoen van die pausche Spaensche Iesuitsche monsteren (d’welcden Iesuitschen mutsen steert van dit monster bediede) dat ooc gantsch Europa door de Iesuitsche oft Esauitsche generatie ende verderfelijcke Sprinchanen (wt den afgront opgecomen) is geplaecht geweest leert dervarentheyt datter gheen Coninckrijck noch Vorstendom, noch Landen noch Steden en zijn, die door dese Iesuitsche grouwelicke monstrueuse hoornen niet en zijn gestooten gheweest doch de particulariteyt van dien moeten om die lancheyt der materie hier voorby gaen