[2 Iulij en 23 November 1577]
Inden jare 77. den 2. Iulij is tot Saftingen inde Schelde eenen grooten Vis (een Sprutswal oft Waterblaser ghenaemt) aenghecomen, ende ghevangen, was lanck 58. voeten, ende 43. voeten dick. Int selve jaer den 23. dach November, zijn in Hollant voor de strande ghesien 13. dierghelijcke waterblasers, bedrijvende groot gewelt, ende ghetier, sulcx datter een van hun de strande te naer comende is vast ghebleven: De ander dit siende, deden groot ghewelt, met water voerenom hem wederom af te helpen, maer te vergheefs, sulcx datter ten lesten noch twee vande andere daer toe op strande vast raecten ende daer blijven moesten. Den grootsten was lanck 99. voeten.
Maer wat teeckenen zijn dit gheweest, wat is daer na ghevolcht, is dit alsoo ghepasseert sonder datter yet opmerckens weerdich toeghecomen zy? ghewisselijck neen, is niet dat selve jaer dien grooten Spaenschen waterblaser Don Iohan int Gouvernement der nederlanden ghecomen, wat listen wat lagen, wat practicken heeft hy te werck ghestelt, om die landen onder dat Spaensche jock te brenghen, waren die beroerten op dien tijt niet so groot als wel oyt te voren oft daer naer gheweest zijn, eenighe Provintien hielden Don Iohan voor haren Gouverneur, die van Brabant ontbieden den Prince van Oraengien, andere ontbieden den Eertshertoghe Mathias, voor Gouverneur, in somma de beroerte vermeerderden haer van allen sijden, als die voorsz. Waterblasers oock die Zee beroerden. Ten laetsten is den Don Iohan aen die strande der Spaenscher hoochmoedicheyt ghesmeten, ende sijn verradery is ontdeckt, niet teghenstaende het geweldich water blasen der lants verraders, sijne complicen ende metgesellen die hem geerne afgeholpen ende verlost souden hebben, maer te vergheefs. Wat daer meer ghevolcht is, willen wy den Leser tot de Historie onses tijts wijsen.
Auteursrechtvrij