Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe
(ca. 1621-1658)–Anoniem Vrouwen-peerle–
[Folio D1v]
| |
in pelgrims habijt, ende haren man oock met het perijckel haers levens te soecken ende des anderen daechs heeftse haer bereydt te reyzen, ende heeft aengedaen een Pelgrims cleet ende nam met haer een cleyn herpe, ende is doen haestelijc den Ridder gevolght tot Venegien in sijn herberghe daer sy vanden weert vriendelijck ontfanghen was: ende seyde, Vrient weest willecome. Ende wandt het op den noen was, soo leyde den weerdt haer ter kameren daer den Ridder met meer anderen was geseten ter tafelen, ende seyde, Heere wildy met dese goede mannen wat eten? Doen seyde de vrouwe in't habijt vanden Pelgrim, Heer weerdt mijn gheldt is luttel, ende ick waer gheerne noch voorder, soo sorghe ic dat ick niet ghelts genoech hebben en soude tot dat ick weder come in mijn clooster, Doen seyde den Ridder Heere comt hier by ons sitten eten, ende maeckt goet chier, ick sal desen dach voor u betaelen. Ende de Pelgrim dede na des Ridders wil, etende ende drinckende met hen. Als daer de tafelen opghedaen waren, soo nam de Pelgrim zijn herpe soetelijc spelende: ende daer op minlijck singhende, soo dat sy al dat geselschap verblijde, ende het behaechde den Ridder seer wel, ende hadder soo grooten ghenuchte in, dat hy hem vraechde, Heere waer wildy reysen. Doen seyde den Pelgrim, Ic soude geerne besoecken dat heylich graf ons Heeren te Ierusalem, maer ic sorge dat my mijn teergelt ontbreken sal. Doen seyde die Ridder, Reyst met my, ick sal voor u betalen v schiphuere ende uwe montcosten dies den Pelgrim blijde was, ende ginc te schepe metten Ridder ende met veel cooplieden, daer hy genuechte maeckte, hen allen den tijdt vercortende metten spele van zijnder herpen ende vedelen, daer mede suetelijck singende, datsy met genuchten over quam. Als dat schip te lande was soo gingen sy al uyter schepe. Doen vraeghde den Pelgrim den Ridder nae den wech van Ierusalem, hem seer bedanckende, ende seyde: Godt die alle dingen geschapen heeft moet u loonen de deughden die ghy my ghedaen hebt, want wy moeten nu scheyden. Doen seyde die Ridder: Neen Heere, mijn begheeren is dat ghy met my reyst tot onsen Coninc, om een maent by hem te blijven ende hem wat ghenuchten aen te doen, ende wat ghy dan begeert sal u ghegeven worden dat gelove ic u by mijnder trouwen |
|