bedroeft seyde aldus: Ghy sijt mijnen Heere, dese Dochter, ende ick zijn u, aldus mooghdy met den ghenen dat u is uwen wille doen, ende in het ghene dat u ghenoeghelijck is, en wil ick geen ongenoechte maecken. Ick en begheer niet meer te hebben dan u vrientschap ende ick ducht niet meer te verliesen dan u, ende dit is gheplant in mijn herte, en sal oock blijven tot in mijnder doot.
Gautier dit gheseyt hebbende scheyde droevich van daer, ende hy seynde eenen Dienaer die secreet was aen Griselde in haer camer dien hy ghezeyt had wat hy doen soude. Desen dienaer quam tot haer in die camer, ende seyde: Lieve vrouwe, vergheeft my dat ick doen sal, want ic het doen moet, van mijnen Heere, my is bevolen te nemen u ionghe dochter, ende zijn leste bevel en dorste hy niet segghen, Maer maeckt een droevich ghelaet. Griseldis verdroeght lijtsamelijcken, nochtans meynde sy dat hy't dooden soude, om die woorden die sy van haren man ghehoort hadde, ende en weende, Oft en maeckte gheen droeffelijck ghelaedt al hadt nochtans anders niet dan een voester gheweest 't waer verdrietelijck geweest. Sy nam haer Dochter in haer armen ende beklaeghdese seer ende sach op haer ende kustese ende maeckte een kruys voor haer voorhooft, ende gafse den Dienaer segghende: Gaet ende doet dat u Heere u bevolen heeft, maer ick bidden dat dit jonghe lichaem niet ghegeten en sy vande beesten oft voghelen. Die Dienaer nam dese ionghe Dochter, ende droeghse sijnen Heere, ende seyde hem alle die woorden die tusschen de Vrouwe, ende hem ghevallen waren, ende alle manieren van oodtmoedicheyt: waer af die Heere groot verwonderen hadde, ende dede het kint kleeden ende beval sijnen dienaer dat hy het kint soude voeren te Buenen aen die Gravinne zijn Suster, ende dat hy haer badt, dat sy haer kindt soetelijck op hielde, ende dat zijt wilde leeren in goede zeden, ende bouen al dat zy't niemandt te kennen en gave, wiens kindt dat het ware. Dit gedaen zijnde, Gautier wachte, ende dede wachten heymelijck zijn Vrouwe, oft sy eenighe droefheydt hadde, oft maeckte om deze saecke, maer m'en en konde haer niet vinden, dan datse al soo onderdanich haren man en soo blijde tegen een yeghelijck was als sy te voren geweest had, noch selue noyt woort daer af en vermaende, ende diese soo wel niet ghekent en hadde soude ghemeynt hebben dat zy gheen minne oft ontfermenis op haer kinde en hadde ghehat. Binnen vier Iaren daer na wert sy weder kinde draghende, ende sy wert moeder van eenen jongen sone waer af dat die Vader, ende al zijn volck seer blijde waren. Ende als dezen Sone dry jaer out was, die Vader en dede min oft meer dan hy te voren ghedaen en hadde met zijnder Dochter, om bat zijn wijf te proeven. Ende daer in droech griseldis
Auteursrechtvrij
