Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Gautier beproeft Griseldem dreyghende van haer te scheyden.

ALs dan aldus geleden waren twaelf jaren, dat die voorseyde Dochter geboren was, dede Gautier die nieumaer gaen dat hy hadde brieven ghesonden om te scheyden van sijnen wijve, ende een ander te nemen.

Welcke fame quam voor Griseldis, die daer gheen mentie af en maeckte, oft onghenochte voor haren man, inden welcken sy ghestelt hadde al haren wille. Gautier seynde tot Buenen om sijn Dochter, ende om sijnen Sone, ende dedese halen met grooten staet: die Dochter was dan oudt twaelf jaer, ende hy dede loopen die nieumare, dat dese dochter soude wesen zijn wijf. Ende om zijn vrouwe noch wat te proeven, riep hyse voor hem by zijn ghesin, ende seyde aldus tot haer: Ick hadde groote ghenoechte in onser beyden houwelijcken staet, ende in u deught ghestadicheydt, ende wesen, maer ick hadde, ende noch heb merckinghe in u kleynheden van uwen gheslachte, ende ten behoort niet dat mijn Landt, ende Lieden naermaels gheregeert souden zijn van soo cleynen gheslachte: Mijn Lieden bedwinghen my, ende ick ben alreede in gheloften met eenen anderen wijve, die nu al opden wech is om hier te comen, ende sal hier zijn eer yet lanck.

Ick heb dickmael gheweten dat naer veel gheluckx veel onghevals en ongheluckx quam. Ende alsoo ist met u, ende met my. Als mijn Bruyt hier komt, ruymt haer ende treckt wech, ende maeckt u ghereet wech, ende maeckt u ghereet om wech te trecken in u eerste wooninge, sonder yet te murmureren, ende draeght wech, het gene dat gy hier ghebrocht hebt, ende laet hier dat

[fol. C4v]

ghy van my hebt: fortuyne en is gheen erue.

Griseldis antwoorde, ende seyde Altijdt heb ick wel bevroedt, ende gheweten dat van uwer Hoocheyt ende Edelheyt, ende mijnder cleynheydt, ende armoede en was geen gelijckenisse ofte parture na uwer afcompsten, ende huyse.

Daerom heb ick patientelijcken het selue verdraghen. Ende ick en achte my niet weerdich te zijn u wijf, noch selue te wesen u dienst-maecht, ende in u huys daer ghy my maeckte een vrouwe hebbe ick altoos in mijn herte ende in mijn gepeys geweest als Martha, ende een bode, niet anders, dies neme' ic Gode te ghetuyghen. En van deser tijdt dat ick met u was, hebbe ick geweest geeert in uwen naem dies ick niet weerdich en was: daer af soo danck ick u, ende geve u lof, ende gratie Gode, ende u Heere, ende ic ben al bereet met goeder herten ende sonder murmureren te keeren in het arme huysken mijns Vaders, in welck ick leyde aen mijn ionge dagen, ende daer sal ick leyden mijne oude daghen, ende daer sterven als geluckighe, ende eerlijcke Weduwe, ende als de ghene die geen wijf gheweest en heeft van een sulcken edelen mogenden, ende grooten Heere. Vwen nieuwen wijve der Bruyt sal ick gheerne ruymen, ende die weerdicheyt overgeven, Got biddende dat sy gheluck brenghe, ende vinde. Ende het ghene dat ghy my beveelt wech te dragen dat ic hier bracht ende te laten daer u is: ic en hebbe niet vergheten dat in tijden voorleden, als ic worde u wijf, dat ick ontkleet werde voor mijn Vaders deure van mijnen kleynen ende armen habijte. Ende daer werde ic gekleedt met uwen eerbaren, ende kostelijcken kleederen, ende al-soo quam ick hier. Aldus en bracht ick niet met my dat mijn was dan armoede, ghetrouwicheyt, ende mijn suyverheydt. Ende ghelijck dat ic liet mijn arm voorseyde habijt voor u allen, soo sal ick my ontcleeden, ende laten dit eersaem habijt. Also dede sy uyt haer cleederen, ende gafse hem ouer, ende den rinck daer sy mede getrout was, ende alle de andere cleederen, ringen ende juweelen die welcke mijn plagen te zijn, Heere die zijn in u camer. Ic quam by naest naeckt uyt mijns Vaders huys, naeckt sal ick daer weder in keeren.