Hoe Martijn te Tours van de trappen viel.
MArtijn die een van Helenaes kindren was, was een devoot Iongelinc, soo dat hy des nachts metten Bisschop ter metten ginck. So gevielt op eenen tijt als Martijn de trappen met haesten soude af gaen, so had den vyant die alle deucht benijt, erweten gheleyt op de trappen. Ende als Martijn afgaen soude, viel hy van boven neder, so dat hy langhen tijt lach sonder spreken ende als hy wat bekomen was, seyde hy: O Heere Iesu ick dancke u dat gy my tegenspoet verleent hebt in uwen dienst. Ende is ten lesten weder de trappen opgegaen nae zijn beste, ende ginc weder te bedde liggen, ende seyde: O Heere ic dancke u dat gy my wat teghenspoets toe seynt, want het is een kleyn pijne tegen de pijn die gy voor my geleden hebt. Dus naer dat hy eenen tijt sieck gheweest hadde, is weder ghenesen.
Auteursrechtvrij