Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Hoe Coninck Anthonis ende Coninc Henderick comen binnen Napels,

ALs dese Coninghen, den langhen tijdt Helena ghesochdt, ende veel batalien ende strijden hadden gehadt langhe iaeren, ende menighe stadt kersten ghemaeckt, schreef den Patriarch aen de Coninghen hoe hy een vrou in zijn hof hadde die by Helena gewoont hadde. Als de heeren dit hoorden waren sy verblijt, ende braken haer heyr op ende ghinghen te schepe om nae Napels te komen. Ende de heeren hadden groot verlanghen om die Vrouwe te sien daer den Patriarch af hadde gheschreven. Maer als Helena vernam dat haeren man ende haeren Vader binnen Napels quamen, soo vertrockse van Napels weder nae Graffes, daer zy bleef woonen by die moeder Playsante tot dat Graffes beleyt wert ende trock van daer naer Tours. Maer eer sy uyt Napels ghinck schreef sy eenen brief, aldus: Ick Helena die seven iaeren ghewoont hebbe onder de trappen des Patriarchs mijns Ooms, ghebiede my seer tot Anthonis Koninck van Constantinopelen mijnen Vader, ende tot Koninck heynderick van enghelant mijnen man die my alom soecken om te doen sterven, het welck ick noyt en verdiende teghen hen, maer ghy sult my langhe soecken eer ghy my vinden sult, ende sy sloot den brief toe, ende leyden onder eenen steen in haer huysken, onder de trappen, ende sy ghinck van daer. Als nu die Koninghen binnen Napels waeren, soo leydese die Paus by die trappen daer helena te woonen plach, maer sy en vondese niet, dat den Patriarch groot wonder gaf, ende hy dede een vanden knechten onder de trappen gaen, op avonturen oft sy in eenen

[fol. B6v]

hoeck hadde sitten slapen, ende hy stiet den steen wten weghe daer den brief onder lach dien hy den Patriarch gaf, maer hy en kost den brief niet open doen, doen gaf hy dien Coninck Anthonis: die en kost den brief oock niet open doen, ende gaf den brief voort aen Coninck Henrick van engelant, dien hy open dede, ende las den brief dat sijt alle hoorden. Als nu den Patriarch verhoorde dat sijn Nichte Helena seven iaren daer hadde ghewoondt sonder haer te laten kennen, soo was hy seer droeve, ende alle de Heeren met hem.