Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Hoe Helena van Tours reysde naer Napels.

ALs dese schoone Helena een langhe wijle te Tours ghewoont hadde, soo hoordese segghen hoe dat den Koninc Anthonius haren vader, ende Koninc Henderick

[fol. B5v]

van Enghelandt haeren man van den Turcken verslaghen waeren, ende dat haer lichaemen te Napels waren ghebracht. Doen reysde zy terstont nae Napels: Maer als sy in Lombardijen quam, wertse sieck soo datse ghinck in die stadt van Graeffes in het gasthuys, daer kersten vrouwen ende Ionckvrouwen in woonden. Ende als Helena een wijle tijdts in dat Gasthuys gheweest hadde, soo wertse ghesondt byder gratien Godts, ende door groote neersticheyt die de opperste van het Gasthuys by haer dede, want sy dicwils malkanderen vertelden haer misval ende quaede avonturen.

Helena is daer naer heymelijck uyt Grasses ghegaen sonder des moeders weten, ende doen is sy na Napels ghegaen voor des Patriarchs Palleys, daer den Patriarch quam ghewandelt. Ende als Helena den Patriarch haeren Oom sach vielse op haer knien ende badt om een aelmoesse. Den Patriarch siende datse maer een handt en hadde, werdt hy om Helena denckende, ende riepse tot hem, ende vraechde haer heymelijc van waer datse was ende hoe sy haer een handt verloren hadde Heere seyde sy, ick ben van Tours in Loreynen, ende heb mijn hant verloren onder de roovers die my verfortseren wilden, ende als ick hen niet en wilden konsenteren soo sloeghen sy na my om my te dooden ende sloeghen mijn handt af, alsoo ghy siet, doen riep ick luyde dat my de Lantlieden te hulpe quamen, ende verlosten my van de doodt. Doen vraechde haer den Patriarch oftse noyt en had hooren segghen van een vrouwe die Helena van Konstantinopelen hiet die oock maer een handt en had. Sy seyde: Iae ick Heere, sy heeft te Tours thien Iaer ghewoont in mijns moeders huys, maer sy vertrack van daer, om datse haeren man ende Vader socht, diese sochten om te verbernen, dat sy noyt verdient en had, soo zy my zeyde. Doen seyde den Patriarch, Dochter ter liefden van mijnder Nichte daer ick u nae vraeghe soo sal ick u in mijn Palleys onderhouden u leven lanck Heere seyde Helena ic en begheere anders niet van u dan dat ick onder de trappen van uwen Palleyse woonen mach ende eten de stucken des broots die van u tafelen overschieten.

Dochter seyde den Patriarch, wat ghy begheert sal u geschieden. Ende Helena nam een luttel stroys ende droech dat onder de trappen van het Palleys: Ende telcken als den Patriarch op ende af ginc, ginc hy by haer sitten spreken, want hem docht dattet een goet ende devoete persoone was, maer lacen had hijse gekent, hy had haer meer eeren ende reverentie bewesen.