Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Coninck Heynderick weder te lande comende verneemt de doot van Helena,

COninck Hendrick van Enghelant sijn voornemen in Italien volbracht hebbende is gecomen tot Bolonien, ende sont eenen bode tot den Hertoghe van Clocestre hem segghende dat den Koninck quam, ende dat hy hem seer gheboodt tot Helena, die hy lief heeft boven alle dinck ter werelt. Doen seyde den Hertoghe: Indien hijse soo seer bemint, waerom heeft hijse my doen verbernen met haer twee kinderkens. Doen seyde den bode: O Heere: hebdy die schoonste edelste, goedertierenste vrouwe verbrant, soo vliet wech eer den Koninck kompt, want hy al het goet der werelt soo seer niet en bemindt als hy haer doet. Dit hoorende den Hertoghe, verstondt wel dat Helena verraden was, ende wert seer weenende. Ende korts na desen quam den Koninck te Londen, daer hem den Hertoghe seer blijdelijck ontfinck, ende hy vraechde hoet met Helena was, ende met Maria sijn Nichte.

Doen antwoorde den Hertoghe Seer wel. Doen seyde den Koninck: Ghelooft moet Godt zijn dat hy my soo lange heeft gespaert dat ickse noch sien sal en spreken. Doen quam de oude Koninghinne ende hiet haren Sone willecom met seer groot misbaer, het welck den Koninck seer verwonderde, ende seyde. Moeder en weest niet droevich, want wy alle zijn ghesondt weder ghekeert. De Moeder seyde Och Sone ick heb reden om droeve te zijn, wandt den moordenaer van Klocestre heeft verbrandt de liefste die ick ter werelt hadde, dat is Helena met haer twee Sonen. Van dese woorden werdt den Koninck ontsinnich, ende riep datmen den Hertoghe doot slaen soude, waer af den Hertoghe vervaert was, ende seyde: Heer Koninck het selve dat ick ghedaen hebbe, hebdy my selver gheboden te doen. Doen seyde den Koninck. Ghy liecht valsch verrader, want ghy schreeft my datse gheleghen was van twee honden, dat valschelijck gheloghen was, wantet schoon Sonen waren: Als den Hertoghe van twee honden hoorde, soo wist hy wel dat het verraders ghedaen hadden, ende meynde hem te ontschuldighen teghen den Koninck. Maer de valsche verradersse sprack tot haeren Sone: Haddy Helena soo lief als ghy seght, ghy soudt wel terstondt wraecke doen over hem diese verbrandt heeft met haer kinderkens. doen werdt den koninck noch meer verstoordt, ende greep sijn sweerdt slaende nae den Hertoghe, vraghende hoe hy Helena dorste verbernen? Den hertoghe, andtwoor-

[fol. B1v]

de dat hijt hem bevolen hadde met negen brieuen die neghen diuersche Boden tot hem brochten beseghelt met des Coninckx principalen Seghel, het welcke hy begheerde soo voort recht te toonen. Doen seyde den Coninck, kondijt voor Recht thoonen, soo vergeue ick u der misdaedt. Doen ghinck den Koninck met de Heeren opt palleys, daer d'oude verradersse oock quam, vragen haren sone waerom hy den genen niet en doode die zijn kinderen hadde verbrant. Binnen desen quam daer eenen vremden Bode tot coninc Hendrick, ende seyde, Heer den Koninc Anthonis van Konstantinopelen is daer, ende begheert dat hy in u Stadt logheren magh. Doen reet hem den Koninc tegen met alle zijn Heeren. Ende vraechde hem wie hy was, ende wat hy sochte coninc Antonis die seyde. Ick soeck de schoone Helena mijn dochter. Doen seyde koninc Henric, ic ben ooc bedroeft om een die Helena hiet, die de Hertoge van Klocestre verbrant heeft met haer twee Sonen, t'welc hy bekoopen sal eer lange. Doen dat den koninc Antonis hoorde veranderde hem zijn bloet, en hy vraechde hem wat Vrouwe dat sy was, ende van wat lande. Doen seyde koninc hendrick dat hijt niet en wiste, maer hy vertelde hem hoe hijse gevonden had by een fonteyn ende hoe sy hem geseyt hadde datse uyt haren lande gevloden was om dat haer vader haer wilde trouwen totten wijf, ende hoe hyse trouden tegen zijns moeders danc makende haer koninginne van Enghelant. Dit hoorende koninck Antonis, riep met luyder stemmen. Och mijne lieue Dochter Helena sijdy doot, dat sal my mijn leuen kosten. Met dese woorden wert koninc Hendric so seer bedruct datmen nauwelijc en wist wiemen eerst troosten soude. Ende zijn soo te Londen gereden met grooter droefheyt.