Hoe Helena te Nantes in Britanien quam tschepe met Cooplieden diese om godts wille in't schip namen.
ALs Helena ontwaeckte waren haer kinderen wech, des sy doen seer weende ende klaeghde: Och armen waer sijn mijn kinderen? eylacen waerom en hebben my de beesten oock niet verbeten die myn kinderen verslonden hebben? Want ick weet wel dat ze my gheen mensche ghenomen en heeft. Dus heeft sy alom half verdult staen sien: daer ze niet en sach aen d'een zijde dan wildernisse, ende aen d'ander sijde niet dan water ende wolcken, ende sach ten lesten veel schepen met kooplieden, daer zy met luyder stemmen toe riep, hen biddende om Godts wil dat sy haer met hen voeren wilden Ende de kooplieden hebben op haer ontfermenis gehadt, ende sijn neven 'tlant ghevaren ende zy hebben haer inghenomen, ende vraeghden haer waerom dat zy zoo droevigh was. Doen verteldense haerlieden haer avonture hoe datse haer twee kinderkens verloren hadde: dies sy alle medelijden hadden, ende zijn ten lesten metten schepe ghekomen te Nantes in Britanien daerse doen oorlof nam aen de kooplieden henlieden seer bedanckende ende is soo binnen de stadt voor de huyzen ghegaen, biddende een aelmoesse om Got: ende is ten lesten ghekomen voor eender Vrouwenhuys, die de arme Vrouwen Lieden herberghde om de helft datse om Got haelden: Daer Helena mede woonde ses jaren lanck. Maer doen vertrocse van daer want die van Britanien al ongheloovige waren. In deser selver tijdt was oock op de reyse Coninc Anthonis met grooter heyrkracht, om te soecken zijn Dochter Helena, ende is soo lange t'schepe ghereyst, dat hy ten lesten quam ter Sluys in Vlaenderen Daer Helena oock eerst aenquam. Ende daer ghinck Coninck Anthonis te lande ende quam in't klooster daer hy na Helena vraeghde. De Abdisse seyde hoe dat zy daer een luttel tijdts gheweest hadde, ende hoe ende waerom datse vertroc-
Auteursrechtvrij