Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Hoe Helena in een Bosch haer twee kinderen verloos.

NV is Helena in dat bootken geseten, ende zy is soo langhe gevloten dat sy in Britanien, quam aen een groot bosch, daerse te lande ghinck met haer twee kinderkens wten schepe het welck den derden dach weder keerde voor Londen op de selve plaetse daer Helena in het schipken ghinck. Doen Helena te lande gecomen was, begonst sy seer deerlijcken te claghen met weenende ooghen, ende seyde. De aldergetrouste maghet des Hertoghen van Klocester Nichte heeft my vander doot verlost, ende is selver voor my ghestorven, het welcke my deyren mach, want ick nu sterven moet vande beesten, al ben ick verlost van den menschen. Al mach ick de doot ontcomen, wie sal mijn kleyn kinderkens voesteren, wie sal mijnen nootdruft winnen, want ick maer een handt en heb om my selven te gheneren. Ende daer naer viel Helena in slaep. Doen quamper eenen wolf ende eenen Leeu ende namen de kinderen, ende droeghense int bosch daer zy langhe vochten om de kinderen, want elck wildese beyde hebben.

[fol. A8v]

Ende dit sach een Heremijt die in't bosch woonde ende liep totten beesten ende wilde hen de kinderen nemen. Doen liep den wolf wech ende liet het een kint ligghen, maer den Leeuw droech d'ander kint in zijn hol. Doen nam den Heremijt het een kint ende droecht in zijn kluyse, ende is doen gegaen daer den Leeu woonde, daer hy wachte tot dat den Leeu uytginck om sijn beiach. Ende als den Leeu verre van sijn hol was, soo is den Heremijt in des Leeuwen hol gegaen daer hy het kint noch vant ende droecht oock met hem in zijn kluyse by d'ander ende noemdet Lion, ende het ander Arm, om dattet eenen arm had aen hem ghebonden. Aldus heeft den Heremijt dese kinderen opghevoet sestien iaren lanck.