Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

[fol. A7v]

Helena wort de hant afgheslaghen, maer Maria van Clocestre des Hertoghen Susters Dochter, ende sijn Nichte Wert voor Helena verbrandt.

DOen de Heeren dit totten Hertoge gheseyt hadden, soo ginc hy tot Helena met den lesten brief die hy haer geheel uyt las met weenende oogen, ende seyde. Ick woude wel dat ick noyt gheboren en waer soo en soude ick dit fel werck niet volbrenghen dat my den Koninck bevolen heeft. Doen seyde Helena. Ist soo mijns mans wille ick wil geerne sterven, maer mijn twee kinderkens deyren my datse sterven moeten die noyt niemant en mis-deden. Och mocht ick mijnen Heere spreken voor mijn doot, ick soude te liever sterven, maer laten neen ick. Vrouwe seyde den Hertoghe, ick moet mijnen Heer een lickteecken van u thoonen als hy comt dat hy niet en segghe dat ick een ander gedoot hebbe. Doen seyde Helena. Neemt hier mijn handt met de ringhen die hy my gaf wt grooter liefde doen hy my trouwde, dat hy nu ghedencke de groote felheydt die hy my nu bewesen heeft. Doen riep hy een van zijn knechten, die hy Helenaes handt af dede slaen, maer de ghemeynte van Londe dit vernemende, wilden den hertoghe doodt

[fol. A8r]

slaen, wandt sy Helena seer beminden door haerder deucht. Als den Hertoge dit sach, leyde hyse wederom, ende dacht dat hijse des anderen daechs branden soude voor den daghe sonder iemants wete. Aldus is Helena al den nacht ghebleven by den Hertoghe met haere twee kinderkens, daer grooten rouwe bedreven wert van alle de ghene die daer waren, sonderlinghe van Maria van Clocestre des Hertoghens Nichte, die meynde wtsinnich te worden ende seyde, waert datmen haer Vrouwe doode, sy soude haer selven oock het leven nemen, ende viel op haer knien voor den Hertoge, ende seyde Oom doet my verbranden, ende laet mijn vrouwe de coninginne leven. Doen seyde hy. Dat en mach niet zijn. Doen seyde zy: Oom ghy sult twee kinderen doen maecken van laken ende andere dinghen die sal ick met my draghen als ghy my doet dooden, midts den welcken ick mijn Vrouwe met haer kinderkens verlossen sal. T'is beter dat ick alleen sterve dan onser vier, soo Oom kiest hier af t'beste. Ende Helena viel in onmacht voor Maria van Klocestre Maria riep met luyder stemmen totten Hertoghe, Oom leydet mijn Vrouwe daer zy vry is vande doot ende doot my, want ick voor haer sterven wil. Nichte seyde den Hertoghe, naer dat ghy voor haer sterven wilt: soo sal ick uwen raet doen Ende hy liet haren arm afslaen die hy sette in zijn slaep-camer by hem ende zy bonden Helenaes hant aen een vande kinderkens ende leydense op het water in een bootken met dry brooden ende wat wijns, ende lietense drijven. Ende doen wert zijn Nichte verbrant voor den daghe dat niemant anders en wiste dan dattet Helena was.