Vlissings redens lust-hof, beplant met seer schoone en bequame oeffeningen

[fol. Rr3r]

Liedt,
Op den sin, Die Godt heeft tot zyn hulp, niemant hem hinder doet.

Stemme: Gabriel was van Godt ghesonden.

VErheught u vry alle oprechten,
Al is de werelt boos en quaet
Al wil de duyvel u bevechten
En dat u vleesch u staegh aengaet,
God die wil u t'samen verhooren,
Dat werelt, duyvel, vleys, niet sal
Noyt maecken dat ghy zijt verlooren,
Maer sult bespotten selfs haer al.

Ghy vrome die staech bid den Heere

Wie sal u eenich hinder doen?
Al zijn u krachten swack en teere
Soo zijt ghy stercker, wilt vermoen
Als de werelt en boose menschen
V Vleys en den duyvel, gewis,
Door Christus siet ghy uwe wenschen
Want u God soo genadich is

David den vrient Gods heeft gestreden
Tegen den Goliat seer groot,
Al was hy kleyn, God was hen mede,
Dat hy den Reuse sloegh ter doodt:
En Gydion heeft sijn vyanden
Met zijn weynich ter neer gevelt:
Daneel ontquam der Leeuwen tanden:
Simson sloegh duysent als een helt.

Christus Soldaten al seer goedich,

Vreest niet God wil u hulpe zijn,
Al rasen u vyanden woedich
En acht dat niet, 't is maer een schijn,
Ons Saligmaker heeft verwonnen
Den doodt, den duyvel, ende hel,
So dats' u niet beheerschen en konnen,
Ghy zijt t'samen vry van 't gequel.

Prince.

Prince den Heer die wil doch maken,

Dat wy hier mogen al te gaer
In sijn ghenaet en vrientschap raken,
Om te bidden soo meenich jaer,
Als hy hier ons sal laten leven
Met oprecht herten menichfout,
Amen, ick hoop God sal het geven
Dat wy kiesen Gods Eer voor Gout.

Ioos Claerbout: