Vlissings redens lust-hof, beplant met seer schoone en bequame oeffeningen
(1642)–Anoniem Vlissings Redens lust-hof–
Auteursrechtvrij
[Folio C4r]
| |
Op de Vrage: Wat oeff'ningh is elck best, en nodighst voor 't ghemeen?
EEn vraegh hier wert gevraeght, om yder een te stichten,
Van d'Acholeyen Blaeu, die met een goet verstant
Dient wel geantwoort recht, oft yemant mocht verlichten,
Want 't is wel eer gebuert, dat menich door het dichten
Verlicht zijn int ghemoedt, en hier naer 't Vaderlant
Hebbende haer ghekeert, en namen in de Handt
Bybel oft Testament, 't welck haer hier wel mocht beuren,
Maer t'haer geboren plaets, zijnde daer in den Bant,
Door Secten vals ontrou, die liever Godts woort scheuren,
En oeff'nen haer staegh, in een deel slechte leuren:
Daerom soo segh ick dan, ist best dat wy ons niet
Wenden tot sulcks, of dierghelijcke malle kueren,
Maer oeff'nen ons staegh, in 't geen ons Godt gebiet,
Dats in sijn woort leersaem, daert ons al wert bediet:
Wat oeff'ningh dat elck best, sal wesen om vercloecken,
Door leest de Schriften wel, 'tis Christus diet ons riet,
Gheen beter oeff'ningh, als Godts Woort t'ondersoecken.
Want Christus dan hier self, dit woort ons gaet verhalen,
Doorsoeckt de Schrift, want die ist die van mijn ghetuycht:
Op datmen niet en soud op ander weghen dwalen,
Maer dat elck 't recht verstant, uyt Godts woort mocht vertalen:
Hy is den Opper-heer, daer 't alles voren buycht,
Laet ons oeff'nen dan, datmen daer over juycht.
Als 't Volck van Iudea, doen 't Wet-boeck was gevonden,
Daer hoordmen hoe dat elck, geneucht uyt Godts woort suycht,
De Priester Esdra oock, las voor al die't verstonden;
Dits dan een waerdenschat, Lofwaerdich om vermonden.
Als Paulus Christi knecht, het selfde ons aenwijst,
Oeff'nent Godtsalicheydt, gaet hy ons daer verkonden,
d'Eerste Timothi vier, sulck oeff'nen hy daer prijst,
Want nergens uyt soo veel, als hier de deucht uytrijst,
Ghelijck men vinden kan seer wel in veele boecken,
Want die hem hier in quijt, geeren sijn Broeder spijst:
Gheen beter oeff'ningh, als Godts Woordt t'ondersoecken.
| |
[Folio C4v]
| |
Doorsoecken dan Godts woort, op dat geen vals Propheten,
Verleyden ons met list, door bedroch vals bedocht,
Want in den laetsten tijdt, doet Petrus ons dat weten
Sullender veel opstaen, die sulcx met stout vermeten
Op Christus reche Volck, oyt hebben sterck gewrocht,
Op dat haer zielen al, geheel end al verknocht,
In Satans loosen strick sou komen tot bederven:
Dies ist nodich dat wy, tot Christus die ons kocht
Weer vlieden doort versoeck, om zijn bevrijdt van sterven,
Hy biedt soo minlijck aen, sijn eeuwigh Rijck te erven,
Voor die sijn Wetten vroom, steedts houden alle daegh:
't Is ongetwijffelt hy sal dees plaets wel verwerven,
Die hier stadich op acht, met eenen yver graech,
Waer vintment anders dan, int ondersoecken staech
Van Godes Heylich Woort, het staet in alle hoecken:
Dus mijn antwoort vry slecht, is op dees kloecke vraech,
Gheen beter oeff'ningh, als Godts Woordt t'ondersoecken.
Ondersoecken oock wel, dat wy ons niet bedriegen
En laeten ons voorstaen, dat wy Godts volck zijn recht,
Bewijsent metter daet, vloecken, sweeren, noch liegen,
Maer onnoosel int quaet, als Kinders inde Wiegen,
Dat hem elck vroomlijck houdt, als een goedt Christen knecht:
Die tot Tessaloni, als Lucas, oock noch seght,
Doorsochten oock de Schrift, hoewel sy d'Edelst waren.
Het dient dan wel gedaen, op dat elck overleght
Dat hy oeffent Godts Wet, tot sijn saligh welvaren:
Gelijck als Godt belooft, dat sulcke veele Iaren
Voorspoedich sullen zijn, en bevrijdt van 't geween,
En eyndlick in den Throon, by Christus t'samen paren:
Dees oeff'ning is dan best, en nodighst voor ghemeen,
Voor die den Heere vreest, d'Godtloose wy uytscheen,
Want haer naeckt groot verdriet, Godt heeftse gaen vervloecken.
Hier mede dan oyt lest, segh ick noch eens met reen.
Gheen beter oeff'ningh, als Godts Woordt t'ondersoecken.
Verwert in Liefde In lief Werkende. Wernaer I.H.B. |
|