Turias ende Floreta

Hoe die ionghelinck Turias seer blijdelijc met den grave ende ridders tschepe ghinck.

ALs dan dye eelmans ende alle dinghen ghereet was, gheboot die coninck dat men een schoon schip toereyden soude, dwelcke hy seer wel versien dede met spise ende met drancke, met harnasch ende met alle tghene dat ter reysen nootelijck was. Ende als dat al tsamen ghereet was sprack die coninck tot Turias segghende. Sone alle

[p. 5]

tghene des ghy tot uwer reysen behoeft is ghereedt, daerom reyst alst u belieft, maer ick bidde u dat ghi mi segt waer dat ghi in den sin hebt te reysen, ende hoedanich u voornemen is, op dat ghi gheen sake en bestaet dye u tot oneeren oft blamatien brenghen mochte. Heer vader antwoorde Turias, minen wille is gedisponeert te reysen int conincrijck des conincx Ados om daer eenighe dinghen te doene die my hoochlijck tot eeren comen sullen. Doen baden hem dye coninck ende die coninghinne dat hi henlieden altijt boden senden wilde, op dat si altijt goede tidinghe van hem verhooren mochten. Ende ten eynde van vier daghen heeft Turias met sijn edelen oorlof ghenomen aen den coninc ende coninghinne die hem met schreyenden ooghen te Gode bevelende de benedictie gaven, hem wtgheley doende tot aen dye zee met seer groot gheluyt van diverschen instrumenten. Ende als Turias met sijn gheselschap int scip waren sprack die coninck tot hem segghende. Sone dye benedictie ons heeren ende sijn godlijcke bermherticheyt blive altijt met u, ick bidde u waer ghy coemt dat ghi altijt ootmoedich ende goederhande¹⁾ sijt tot uwe eelmans, henlieden mildelijck deylende tghene dat u God verleent oft dat ghi vercrijcht, so sullen si u beminnen ende ghewillichlijck dienen. Als die coninck dese woorden ghesproken hadde staken si tschip van lant met groote blijscap seer voorspoedelijcken met goeden winde varende so dat si binnen sesthien daghen quamen int rijcke vanden coninc Ados. Als die schippers lant saghen clam een van henlieden boven op den mast in die meerse²⁾ om te siene oft hi vernemen mochte waer si waren, ende wert merckelick³⁾ siende dat si waren neven die stadt van Selena daer si wesen wilden, ende riep totten ionghelinck Turias seggende. Heere weest

1) Welwillend

2) Mars

3) Duidelijk

[p. 6]

vrolijck want wi sijn alree by die stadt van Sesena, ende die schippers thoonden hem dye mueren der selver stadt, staende op den oever vander zee, vanden welcken Turias die ionghelinck seer blijde was, tot den grave ende anderen eelmans segghende. Ick bidde u mijn vrienden dat ghi met discretien versinnen wilt eer wi aen die stadt comen wat ons te doene staet, daerom laet ons onderlinge raet houden op dat wi ons voornemen teenen goeden eynde brenghen moghen. Ende als si onderlinghe tsamen ghesproken hadden, sloten si eendrachtelijcken dat si met dat groote schip niet aen lant varen en souden. Maer dat Turias die ionghelinck met vijfthien ridders wel gewapent inden boot aen lant varen soude, ende die ander souden tschepe varen.