Turias ende Floreta

Hoe die iongelinc Turias metten grave inden hof quam, Ende hoe hi die scoone Floreta neven een fonteyne vant slapende.

TUrias met dye vijfthien ridders wapende hem terstont. Daer nae sijn si met die voornoemde cooplieden inden boot gegaen, daer met varende tot onder den muer vanden hof, daer si een leeder aen rechten. Doen ginc Turias metten grave ende met vijf ridders seer secretelijcken op die leere tot inden hof, ende die ander thien ridders bleven sijns verwachtende inden boot. Turias metten grave in den hof comende sach die schoone Floreta met haren ioncfrouwen ligghen slapen int groene neven een fonteyne, dies hi in hem selven dachte seggende, ick ben wel geluckich, want tghene is Floreta dat weet ik wel al en hebbe ic haer noyt ghesien. Mettien bleef hi versaecht¹⁾ wat hi bestaen soude, oft hoe hi haer wech crijgen soude. Die grave den ionghelinc siende verstorbeert²⁾ sprac heymelijc tot hem in sijn

1) Aarzelend, in twijfel

2) Ontsteld

[p. 7]

oore segghende. Ten is gheen tijt hier langhe te toevene, noch dees maecht hier te laten na dien wy dus verre comen ghereyst om haer te verwervene, daerom spoeyt u ende volbrengt rasschelijck tgene daer ghi om comen sijt.