De Tsjerne. Jaargang 21

[p. 323]

[Nummer 9]

Jelle de Jong:

Drylts

wy binne de dryltsers

de oanhâldende minsken

dy't de dearinnende diken opdrave
oan beide kanten fan 'e ie-grêft
yn 't helpleaze deiske

hopende

dat de idéalistyske fisken net stjonke

dat de ûnderwetterske moude net boarrelt

en hast twongen

om in skilderstik fan 't stedtsje to meitsjen

en in wenning to bouwen yn 't taskôger wêzen.

[p. 324]

Kampeare

ik haw neist dy oan 'e mar lein
op in loftmatras leafde
ús lichem hat jubele by de muzyk
fan it draechbere radio
de dûbeldakstinte wie ús breidsseal

wy hawwe swommen yn 'e grienens fan 'e berchmar
wy hawwe preaun fan 'e druven út 'e bidelte

yn it exoatyske berchdoarp
lei de sinne op 'e rêch oer de dyk
yn ûnmacht fan lok

de dei wie in smoute causeur
de nacht in gastfrij keslein

wy boarten in godlik spul
dyn lichem kaem krekt út 'e hân fan 'e bakker
waerm en to gnidzjen
dou wiest it daei
en ik wie de gnidder

dou hiest nea noch kampeard
dou wiest de ûnskuld
en ik wie de trou
hwant
op 'e weromreis
doarsten wy beide
de sinne en de moanne noch lyk yn 'e eagen to sjen