De Tsjerne. Jaargang 21

[p. 225]

Durk van der Ploeg:

Whites only

God is yn Amearika
De blanke fakbounslieder
De swarte wurkleaze
Hy reizget troch de States
Alabama, Virginia West, Chicago
De wite stêdden fan Amearika
Mei de swarte treinen
Mar hwa wol der noch
Nei dy negerij?

Bessy Smith is
Opstien út 'e deaden
De jiskman fan Broadway
faget de kaertsjes byelkoar
The Death of Bessy Smith
Alle nachten wurdt se
Op 'e nij formoarde
Elke nacht reint it kaertsjes
Op de sniebline strjitte
Fan Broadway
De jiskeman faget se byelkoar
Mei de hounekeutels
Fan Mister Charlie syn
Pikkynees. De negers
Hingje as apen efter de traljes
To gnizen

Dat moast Franklin Roosevelt
Nou noch ris bilibbe hawwe
Al gun ik him de himel al lang
En winskje ik Martin Luther King
As earste negerpresidint
En syn ambivalinte God

[p. 226]

Us beppe

Us beppe waerd berne op in grubben bêd
Se stoar 80 jier letter op in springfear
As ik by har útfanhûze en foar de spegel stie
Sei se: Pas mar op aenst slacht de divel dy
Foar de kop. Pake hinge in wyt lekken oer
De spegel doe't beppe stoar; in roukleed
Foar de divel. Nou is allinne har deftige
Photographie noch by ús yn 'e keamer
Beppe mei de kraeltsjejurk en dêrûnder
de glêdde snuten fan 'e skuon ta
Teken fan sneinskens út 'e tiid dat
Beppe jit faem wie

[p. 227]

Us pake

Pake rekke op syn fjouwerentachtichst
Noch nei New York en liet him yn in
Limosyn troch de stêd ride
Mar yn it album is er in trawant
Efter beppe mei in hearich strikje
In garribaldy en folle triennen oer
Hwat noch komme moast

[p. 228]

Antropomorfisme

God wie fan flesk in man
Mei in burd, in stêf klaeid yn
Lekken à la Isings en Jetses

Alles sjende, hearrende
Mar earne úneindich wan-
Nelt Hy bûten de Wrâld
Efter de rêch fan de mins-
Ken

God leit yn my bigroeven
Syn lichem is stadich fortard
Syn eagen heldersjende nei
De Opstanning bistiet Er wûn-
Derlik hûngerich delsjend op-
Sjend as by helder waer
In flechtsjende Geast

Earne yn it hielal in
Forgien byld dat men fortelde
Unsichtber wurden witten-
Skip en it restant in tear
Biwiis fan it leauwe