De Tsjerne. Jaargang 20

[p. 121]

[Nummer 4]

Tiny Mulder:
N.S.-cyclus

1 Trein

tsjillen rûtse fan dy ôf
flatgebou
flatgebou
men freget jin ôf
hwer't sa gau de flinters keare
noch in lêste himelhege
biwenning dan it lege
grien en bisten

wisten wisten
jim it net?
ôfskie né
in string fan 't hert knapt
en yn de fierte
swarte fierte efter my
silstou sitte
by de opprikte flinters
slacht de flamme dy net út
dou foar 't rút
ljept gjin fjûr fan dy
my efternei?

sit stil
ik bin fortrokken
op wide greideblokken
stiet de damp
yn in flarderige moanne deadelamp

efter 't boarstbien lypt de pest
sparje de flinters
lea 't hat west

[p. 122]

2 Stasion

treinen skotse
werom en foarby
hupsûpengroattenbrij
se nimme dy yn de govert
mar de dounsmaster
mei de reade pet
hat my yn de telefoansel
finzen set
en gounzjend skotse se mei dy
werom en foarby de perrons
nei oare stasions

is it al nacht
nou't de rein fluitet?

3 Telefoansel

ljochte sel yn de joun
mei ûngefear twa miljoen
kânsen yn keamers en gongen

hui even mei dy boartsje
foar in dûbeltsje en in kwartsje
mar dyn kaei
is blykber brutsen
hwa hat dy kaei
yn de bûse stutsen?

de hoarn hat him forhongen
earme leave telefoan
swart dôf stom
stoarn
ik jow him de stasionschef oer
hy wit hwat dit bidoelt
hy streaket stadich
de hoarn en gûlt

[p. 123]

4 Wachtkeamer

hjir mei ik wachtsje
ha se sein
út de hjerstwyn út de rein
ober ropt syn sos
nei de kok
kofje foar de toarstige
broadtsje foar de hongerige -
- neat foar de leavjenden

de leavjenden ite de moanne

de leavjenden drinke de rein

mar bring dizze frou brea
telefoan nei him is dea
libbenstried is leechblet

kok forjit de kofje net

5 Spoarboekje

spoarboekje lêze
nimmen wêze
sifertabellen
by elkoar optelle
en de som fan fortrek-
en oankomstûren
omrekkenje yn fluitsjende ûren
tusken gleon binijde muorren
dêr't wy elkoarren
leafde fuorren

[p. 124]

6 Rangearterrein

néonkonstellaes es
op acht meter hichte
de stjerren skamje har dea
bidêst glinsterje de sliepende
rails om har drokke dagen
de wikselwachters lizze
slûgjend by de tv
stel dat ik út dizze
exakte chaos
de wiksel foun
fan it spoar dat nei dy roun

yn de fierte wikselt it sein
der rydt in hert foarby
yn de deadewein

7 Oerkapping

God bout in biskermjende
oerkapping
oan beide einen iepen
ien om to weitsjen
ien om to sliepen
en alle flinters reitsje
út it net út de vitrine
alle treinen kinne weromkeare
alle sellen kinne iepen
finzenen en deaden
lizze nije
forbiningen
mei de leavjenden
de frijen