De Tsjerne. Jaargang 19

[p. 167]

[Nummer 5]

Tiny Mulder:

Viadukt

in viadukt is boud
foar wegen dy't elkoarren ha to mijen
dus gean ik boppe
en dou ûnder lâns
ik wit alteast dyn grêf
net yn hwat tiid of rjochting
oft de himel is

wy moasten ús
needsaeklik fan elkoar bifrije
sa neamdest yn de deaskrik
my - dyn bern - dyn mem
de libbensrollen binn'
per slot omkearber

grif giest dus boppe
en ik ûnder lâns
en sjochst loksillich
lynjend oer de balustrade
my gean omleech omheech
de kurve lâns fan noch nomade

[p. 168]

Ferve hus

de skilder hat hjir west
en de stoffearder
it hûs rûkt skjin
de kleuren roppe klearder
de sounens om
fan doarren en kezinen
en bûtendoar fordiele linen
feninich skerp yn 't lak
de greatske romte
yn rjocht- en trijehoeken
foar dit wis hûs
mei tún en stek en paden
gjin plak hjir mear
gijin plak
foar earmen en nomaden

de nije stoel stekt dryst
it bekling nei de sulvren souder
mar jouns yn de biskaefde skaden
fan hjir en dêrre lampkes
rekt tryst ûnwennich
de stoel syn earmen
nei 't ûnwennige bihang
elk dy't hjir komt beart
kreas en sa gesellich
en beart my bang

de skilder hat hjir west
it hûs rûkt nij nei âld gefaer
hy ferve glêd de doarren en kezinen
sjochst wol hoe kreas er ferve hat
hy ferve ek myn eangst
foar wissichheden
wer wyt en swart