De Tsjerne. Jaargang 19

[p. 107]

Anne Jousma:
Myn blauwe faes

Blauwe faes fan Leardam glês,
yn de spegeling fan dyn slanke
heimich glêdde, linige flanken
glieden bylden, dy't ik lês:
groetenis út groteske wrâlden,
heal forgetten, heal ûnthâlden,
as in magysk toverfers.

Blauwe faes fan libjend glês,
libben stil ta gloed bistjurre,
gloed, dy't glânzgjend libbe en fjurre,
spegeling fan libben, - wês
ek yn spegeling biwarre.
Lit dyn fuortbistean biswarre
yn de lûden fan myn fers.

Blauwe faes fan brutsen glês,
doffe diggels sûnder gloede.
'k Ha dy net genôch bihoede,
dyn bistean wie tear as gers.
En myn hân hat ûnbiwitten
dy fan glâns ta gruzels stjitten.
Ik doch boete: libje en wês
yn de spegeling fan myn fers.