De Tsjerne. Jaargang 19

[p. 17]

Ik sykje in hus

Ik sykje in hûs
Kreakjend yn de winter;
In doar iepenslaend
Oer skranke teilen,
In yngong fan ljocht.

Hwer moetsje ik
de mem, de ingel
Fan dizze ierde?
Hja neamde my takomst.
En dizze groun
Neamde hja fal.
En ik flechtte
Fan har oantlit
As in ûntsleine
En sliepte oan
De rânne fan de wrâld.

Hoe swimme nou de lome
Doarren yn myn hân,
Nou't de nacht falt
Oer de bittere hôven,
Under myn fuotten
Kreaket it hiem
En nimmen ken my.
Ik ken it each fan
De doarren,
Mar yn it each fan
De mem skommelt
Wjerkeatsend
In lege lampe.