De Tsjerne. Jaargang 16

Frysk en frjemd:

Jild foar Shakespeare-oersetting

Wylst wy dit skriuwe, moatte Provinsiale Steaten yn har wintersitting noch bislute oer in útstel fan Deputearren om in subsydzje fan 10.000 goune ta to kennen foar de útjefte fan Shakespeare syn folsleine toanielwurken yn de Fryske oersetting fan dr. Douwe Kalma. (As dizze Tsjerne by de lêzers komt sil - nei't men oannimme mei - dit subsydzje yn tuskentiid al troch de Steaten takend wêze). It bidrach fan f 10.000, - is bidoeld om útsmard to wurden oer fiif jier - de Fryske Shakespeare-stifting (dêr't E.B. Folkertsma foarsitter fan is) hat ntl. foar de fierdere útjefte in fiifjierreplan opmakke, en in totael subsydzjebidrach fan f 20.000, - frege. Neffens Deputearren mei derop tidige wurde dat û.o. ek de ryksoerheit genegen is, har finansiéle bydrage ta dit doel to forlienen.

[p. 380]

Mear stipe frege

De Kommissaris fan de Keninginne yn Fryslân, mr. H.P. Linthorst Homan, dy't ta gelegenheit fan de iepening fan de Fryske Boekewike '61 op 13 oktober yn Boalsert al meidieling die fan boppeneamd útstel, krige fan de foarsitter fan de Stifting It Fryske Boek, de hear Keimpe Sikkema, in mennich sêfte winken, allyksa tsjinjende om de oerheitsstipe foar Frysk literair wurk to forgreatsjen. De hear Sikkema wie, sa die út syn wurden bliken, fan bitinken dat de bidraggen fan dr. Joast Halbertsma- en Gysbert Japikspriis (beide f 750, -) oan de lege kant binne. Hy oppere ek de winsklikheit, in útjefte oer Harmen Sytstra of fan dy syn wurken mei oerheitssubsydzje mooglik to meitsjen (takomme jier kin de hûndertste stjerdei fan Harmen Sytstra bitocht wurde; der leit yn hânskrift - foar in part publisearre - in wichtige stúdzje fan dr. D. Kalma oer dizze figuer). De foarsitter fan It Fryske Boek ornearre ek, de provinsje soe literaire en literair-histoaryske opdrachten jaen kinne en mooglik prizen foar wichtich literair wurk. Ek de leden fan de advyskommisje foar it takennen fan de Gysbert Japikspriis '61 hawwe by gelegenheit fan de priisútrikking to kennen jown, dat neffens harren de provinsiale oerheit de Fryske literatuer mear as oant nou ta bart troch middel fan opdrachten, subsydzjes ensfh. stypje moat.

Nije romans

Anne Wadman sil, sa is meidield, yn de rige fan de Fryske Bibleteek foar takomme jier in nije roman publisearje: De oerwinning fan Bjinse Houtsma. Yn syn ienmansblêd De Teannewâdder hat de skriuwer oankundige, in fragmint út dit nije boek yn it earstkommend nûmer publisearje to sillen. * Dr. Ype Poortinga en mefrou L. Post-Beuckens (Ypk fan der Fear) sille togearre in roman oer in histoarysk ûnderwerp skriuwe; hja binne al dwaende mei it tariedend wurk foar dizze roman yn koöperaesje, dy't yn de Fryske romanliteratuer oant nou ta noch net bikend wie. * Rink van der Velde hat in Fryske roman skreaun, basearre op syn ûnderfiningen op it plattelân yn Frankryk. It boek sil by Laverman N.V. yn Drachten forskine. * By deselde útjowerij is yn tarieding in nije útjefte fan it forsprate proazawurk (û.o. De rook fan it lân) fan Ulbe van Houten.

Fan stipe nei struktuer

Yn Het Boek van Nu (novimber '61) stiet in artikel fan prof. G. Stuiveling oer de stipe fan de Nederlânske regearing oan de literatuer en oer hwat it departemint fan U.K. en W. yn dizzen op 'e bigreating-1962 to stean hat. De honorearring fan auteurs foar bydragen yn literaire tydskriften sil omheech is it doel, wylst ek it oankeapjen fan regearingswegen fan poëzijbondels, foaral ornearre foar bûtenlânske ynstituten, syn bislach krije sil. Fierders sil der by it Ryk in mooglikheit iepen komme foar stipe op oanfraech foar auteurs om in bipaeld wurk rêstich ôfmeitsje to kinnen. Oft Fryske auteurs ek yn dizze side en satyn falle meije stiet der net apart by, mar it hat eigenskip fan wol.

FREARK DAM