De Tsjerne. Jaargang 16

Yaakov Cahan:
Tirzah

Dei op dei as it dûnker falt
En de wrâld is mei stiltme bifongen
Dan giet Tirzah, leaflike faun
Ut yn it hûf to sjongen.

Dei op dei as it dûnker falt
Strykt dêr op sêfte fearren
In cherub del yn it skimerjend hûf
Om nei har sang to hearren.

It leaf is roerleas mei de wyn
En alle fûgels swije
En de cherub hâldt de siken yn
By Tirzah's melodije.

Dan rint in triljen troch it struwel
Yn dy heimige nachtlike ûre
En Tirzah sjocht oer it skouder, kjel
As hie har in hân biroere.

Mar dan sjongt hja wer allike klear
Hwant der wie dochs neat to fornimmen
En de cherub, syn wjukken yn earbied gear
Stiet harkjend tusken de beammen.