De Tsjerne. Jaargang 15

[p. 275]

Tjitte Piebenga:

Pepita

hwa hat sa slank sa slank
de romte frissle oan dyn flank

hwa hat sa fier sa fier
it boartsjen witten fan dyn hier

hwa hat de knoppen fan dyn tsjoen
ea iepen sjoen

hwa ja hwa nimt dizze frou
har riedlings ou

[p. 276]

Ahasveros

wit ik oan dyn pearse skerte
leafste leafste fan dit liet
dat fan ien
en twa en
trije
read en read
to sjongen stiet

leit it skinken fan dyn lippen
oan de iggen fan myn lea
bliuwt it hjoed
en moarn en
juster
leafste leafste
brek my dea

[p. 277]

Joke Singel

reade rokjes joke singel
tikkelwurge hakjes gean
wetterrimpen eltse ûre
joke singel en har klean
waeije tulemoai bisletten
amper singelier bywei
joke singel garret herten
garret herten dei oan dei

joke singel joke singel
wankelswiere glimket mear
linkenflugge singel joke
dei oan dei en wûnderklear
joke singel rispet herten
rispet herten kear op kear

glimket derten joke singel
joke singel mear en mear

[p. 278]

Bumbel Bii

eksperimint nei oanlieding fan The flight of the bumble bee fan Rimsky Korsakoff

bumbel bii de flugge miggen
bii de bumbel lâns de iggen
toetsen snaren en trompet
bii de bumbel bii de bet
bumbel bii it flugge draeijen
bii de bumbel en it waeijen

bumbel bii is roun forsein en
bumbel bumbel jeije rein en
de trompetten konkelrêdde
bii en bii de bumbelsêdde
bumbel mei de skampelwé
bii de bumbel bii de bé