De Tsjerne. Jaargang 15

[p. 266]

Jan Kroes:

Op in kear sil ik it witte

as de moanne
op in joun
leech stiet
en twa eagen tichteby
sil ik nei de fûgels sjen
op har nachtflecht
en de wyn achtslaen
en de bern fan myn broer

dan sil ik nei it tsjustere wetter gean
syn swarte blêdspegel

dan sil ik witte
hwat der tusken my
en it libben
stiet

[p. 267]

 

hwêr is it bist

 

dat yn my opsprong

 

 

 

de hynst wrinzgjend yn myn tinzen

 

de panter slûpend troch myn dieden

 

 

 

myn steppe hat in asfaltflier

 

de geur fan de proai stjit my ôf

 

 

 

de greate dizen binne nuet

 

der lizze wegen troch de sompen

 

 

 

mar myn hert hat gjin cao

 

en op syn púnfallen

 

kraeit de hoanne

 

forried, forried

[p. 268]

 

as immen witte wol

 

hoe as ik bin

 

lit him it lân yn gean

 

súdlik fan de is tsjûkemar

 

langstallich wreed gers

 

en freegje it de fûgels

 

 

 

of lit him gean nei minse' kragge

 

en freegje it de reiden

 

fammen fan de wyn

 

myn hân wie doe brún

 

fan it waer

 

 

 

dêr is it wetter ek

 

it rêstige fan de feanputten

 

lyts, by de âld sédyk

 

 

 

dêr earne stiet in hûs

 

noartsk by de feart

 

 

 

myn dreamen hawwe der

 

as flinters boarte

 

freegje it de feart

 

 

 

mar siz net hoe't ik wurden bin

[p. 269]

 

dou hiest my leaf

 

ik hold fan dy

 

 

 

noch wit ik

 

hoe't it hert

 

stadich út my weiwjokke

 

dy lêste weromreis

 

 

 

oant ik leech wie

 

en treast socht

 

by it freedsum driuwen

 

fan de nachtwolken

 

 

 

wer nomade

[p. 270]

De eangstige

fuotstappen foar it raem ûntkeare him de sliepen
en dreamen snobje gysten fan syn bloed
sa stiet er helpleas yn it hunend hjoed
en tinzen helje him as messen iepen

dan winsket er in eptich boargerman
mei in goed salaris, frou en bern to wêzen
mei in tv en blommen foar de glêzen
in túntsje en bb en oars wit er net fan

safier is it noch net dy maskerade
is him noch justjes oan de iere kant
hy giet oerein en flybket tsjin 't lewant
mar lizzend wer heart er syn hert, iensume kanonade