De Tsjerne. Jaargang 15

[p. 265]

[Nummer 10]

A. Jousma:
Hwer? hwa?

Hwer binn' wy hjir, hwat lân is dit,
hwat sjongt de wyn, dy't oer ús giet,
hwat lokje al dy gleone ballen,
yn hokker tsjoen binn' wy forfallen
fan ljocht en tsjuster, tsjuster, ljocht,
fan libben, dat de dea oandocht
en jimmer libben bernet?
Gjinien wit, hwer't er wennet.

Hwa bin ik, dy't hjir swalkjend giet
en eigen sprake net forstiet,
in ienlik wêzen mank de follen?
Hja ha myn liet net hearre wollen,
myn wurd het net it boadskip brocht,
al hoe ynmoedich dat ik socht
om 't heimnis - nimmen ken it -:
gjin ien wit, hwer't er wennet.

Hwa bistû, dy't dit lân en al
hwat it omfettet yn syn fal -:
de wyn, de stjerren en de hallen
fol ljocht en tsjuster en de rollen
fan dea en libben en de tocht
fan alles hwat om libben focht,
troch dyn bistean bileannet?
Hwa wit hjir, hwer't er wennet?